師奶仔又出動了

今日去超市買沐浴露，貨架上顯示$49.9兩支，出到收銀處時，却收了$59.8，問番個sales，佢都好好人幫我入去貨架check。等了差不多兩分幾鐘，個sales取回所有該貨品嘅特價牌，原來減價已做完，但個sales都好好人，俾我以特價來買該貨品。LUCKY！成為最後一個買到特價貨嘅師奶仔，YEAH！

咭片

等了八年，終於有自己的咭片了。
常常被人問及有沒有咭片，我只可以尷尬地告訴別人：『對不起！我沒有咭片的！』記得有一次，有人問我取咭片，並以這一句回應我：『某某人也有的，為什麼你沒有咭片﹖』我當時只感到她覺得我只是一個 SMALL SMALL POTATO。好瘀呀！
今日收到人生第一張屬於自己的咭片，SO PROUD！

倒數

還有不足兩星期，媽子與爸B便會去多多了，哈哈！到期時又是無政府狀態，可以玩過夠。若果能夠唔駛返工的話，重過癮！由今日起，開始倒數........11、10、9、8、7、6、5、4、3、2、1、YEAH YEAH YEAH！

散沙

而家公司的狀態，只可以用 『一盆散沙』來形容，無制度可言、怨聲載道、士氣低落、有咁衰得咁衰，究竟何時才能打破這個宿命﹖今日放工後覺得整個人好虛、好浮，因為今日工作得好辛苦，好想停下來休息一下。

笑

YEAH！今晚放工返到屋企，發覺開了冷氣，感覺 SO FRESH！
今日同個法國人交談，雖然用了一些簡單的英語，但他似乎都是不太明白。那一刻嘅他，讓我感覺到自己在異國旅行時，不明白對方說些什麼時候的樣子：『扮作明白對方的意思，然後笑笑口地打完場』。哈！估唔道大家也是同出一徹。

荒謬！

簡直是一個大笑話。
已離職的職員，今天回來做替工。荒謬的是，一個男的，頂替一個女的工作！雖則說是男女平等，男的可做女的；女的也可以升任男的工作，但在我們這一行，只能說是 "impossible"。相信今天終於明白我們當初所說的尷尬情況：李xx vs ?xx。Who is xx actually?

死結

今日放假，原本諗住call家姐、姐夫上來屋企食飯。點知老豆兩點幾自己一個出咗街，我諗住佢都係靜雞雞落樓下食碗豬手麵，但媽子四點幾打電話俾老豆，叫佢買D嘢，點知佢話去咗銅鑼灣，晚飯都唔返黎食喎！之後媽子重同我講，叫我唔好同家姐及姐夫講這件事，廢事佢地知道老豆避佢地喎！>()<

其實話晒都係一家人，而且家姐都係佢個女，點解老豆會咁樣﹖佢幾唔鍾意都好，求其 "爬" 兩啖飯，自己坐開睇電視咪算囉，或者關上房門瞓覺都好呀，男人老狗做咩做到咁小家呢﹖為咩要為咗一件無可再小的小事，而唔鍾意一個人咁耐呢﹖家姐同姐夫都盡力迎合老豆啦。人地就你，你都唔領情都無藥可救囉！

我也曾經為這件事同老豆講過不下數百次，次次也是鬧交收場。我同自己講過，唔再勸D咁STUBBORN嘅人，佢鍾意點就點。之後我重同媽子講，以後上去家姐屋企食，好過睇嗰D人嘅黑面食飯。

no choice

今日4點幾才食晏，諗住好耐無食過小巴街嗰間越南嘢，走入去order指定菜式，發覺同以前經已係兩回事。唉！好失望！又少了一間choice。

雷聲大、雨點小

開頭虛張聲勢，又咪貫徹始終，為了自己利益著想，攞了幾天的假期。如果真的是為了人地好，為何生霸死霸後又置之不理﹖最終又咪係唔夠人！人地真的是夠老友啊！

激氣！

一個月後又再嘈要走，走啦走啦！我地唔會再阻止佢喇！根本佢都唔明大家點解有咁嘅選擇，成日都覺得自己無路可行，以為我地好似逃避咁，佢有無諗過我地的處境：包括A.L.星期四發生的事、阿頭對我地的態度等等。
從來我都唔會咁容易俾面色人地睇，但我唔可以再忍受佢嗰D無理取鬧、蠻不講理，黑口黑面對佢都唔過份。

I WANT MAGIC

人飄忽不定，究竟點樣先可以對別人所想的瞭如指掌﹖有時佢好像很明白你，很啱channel，always by my side；但突然間又好像另一個人咁，所作所為却處處傷害你。若果有一種魔法能夠看通他的心，多好！

革命

遇上三號波，唔知好事定唔好事﹖若果今日要返工，就要早D返公司做嘢；但撞啱今日放假，可惜就因為遇上三號波，革命不能成功，要待下星期才可以再攪革命，唔知到時又有什麼阻滯﹖又要屈多一個星期了！HELP！HELP！HELP！

跌到谷底

好灰呀！被人激親呀！不過我不是最慘，E才是最慘、最辛苦、最鬱結。
自從新官上場後，一次又一次打擊緊我地，最新發展的是 "c唔好叫醒佢" 、 "人命當兒戲" 、 "2:14 impossible；6:16 necessary" ......。唉！其實佢地係咪想我地走呢﹖攪咁多嘢只會挑起更多的火頭，到時一發不可收拾。其實可以好簡單喎，駛唔駛攪咁多嘢﹖！要趕我地走，求其找個理由就可以喇！

驚喜2

母親節先由一個炒大鑊開始。
事緣是媽子又再次翻亂我的東西，雖然知道佢是因為想執好D衫，但一向也是她ORDER、我安排時間去做，自己嘅嘢自己執最清楚。不過，今次她又施故技，翻亂我兩個櫃的物品，故一早同佢炒完大鑊就出了街。明乎期實的 ~ 驚喜！

驚喜

最近去了cha cha more more tea食了個 "泰式腰果雞肉烤餅"，比我預期中的出色，令人有驚喜。

星期日是母親節，雖然媽子一早提示唔好買禮物，求其食餐飯就算；但我唔想咁簡單。其實當佢預咗無禮物的時候，突然又有的話，都算是另一個驚喜。因此，今日我也買了份母親節禮物俾佢，希望佢會鍾意啦！

報稅

今日回家收到報稅表，又是感覺痛苦的日子，都唔知點解政府有咁多盈餘，還要我們這些小市民交那麼多稅，要知道香港地住屋貴、交通費貴、生活指數高，養自己之餘，也要養屋企人。財爺可唔可以體諒吓我地呀﹖

擦擦擦！

又一次見證擦鞋友的技倆，應該做的就不去做，擦鞋功夫則做到足：什麼運動不正宗、學過什麼太極柔軟操、什麼煮食物 vs 出街的名單、什麼歡迎歸隊、什麼十一十五............，全都擦得光溜溜。

晚飯

有時真係有D後悔俾一大舊錢做家用，特別是當返完通宵、早收工，諗住難得返屋企同屋企人食個晚飯，點知一係無開飯、一係食埋D餸尾，想食D好些少的都無。又唔係要大魚大肉，又唔係特別揀飲擇食，難得返黎食飯，煮些少餸都可以掛，都唔知俾咁多家用黎做咩！

尋晚又再一次 "歷史重演"，媽子就話自己唔食飯，所以就唔煮，走去游水；老豆則煮了蒸原隻鹹魚仔 (好 "醒" 嗰D)、雞蛋同灼菜，最後我只食了兩條菜便收碗筷，根本無得揀，真係好後悔選擇返黎食飯。

自備購物袋

自從上個月搞了一day的無膠袋日，而家好多人去超市買嘢都會自備購物袋。至於我都好像感染了些少環保的氣息，而家當收銀問我要唔要膠袋時，我會感到好自豪地說：『唔要膠袋！唔該！』但唔知點解會覺得自己好威，勁低B！

失望

今日同老細傾了個幾鐘，因為她強行於我 team 人拉了兩個人手走，重要係有experienced的，之後懶好咁俾返一個新人我，話就話叫我 train up 個新人，但其實就搵我笨。當然佢又用了些無聊的理由去解釋一番，根本佢本身有一大堆 hidden agenda，根本沒有想過改，對這個老細好失望。

受委屈

一次又一次咁blame我唔明佢，其實他知唔知道個遊戲規則係玩點法﹖若果真的不服氣，為什麼不選擇退出呢﹖總好過現在一直埋怨我的不是、我的問題﹖為什麼不了解一下，其實你都有好大的問題﹖點解事情會發展到這個地步﹖點解要將以往嘅一D唔開心的經歷連繫到現在﹖點解覺得自己好慘之餘，又唔了解吓我比你重慘、重難受﹖要講的經已同你講過，若你一直如是，可能先選擇退出的是我 ~ 這是你最不想看見的結果。

HEY MY FRIEND！

YEAH！YEAH！YEAH！老朋友就黎返香港，到時又可以傾天光囉！

天理何在﹖

一個同事於幾個月前經已辭了職，last day都過埋，佢一句話返來做，老細竟然可以當佢無辭過職，重新再返來繼續做，當什麼事也沒有發生過，咁都得﹖！咁兒戲，天理何在﹖

放早的節目

難得一天早放工，本想好好逛逛街，買吓心頭好；但行行吓，覺得WING WING地，好頭暈，起初以為未食嘢先會咁；但食完嘢之後依舊浮浮吓，攪到無MOOD再去行。一向對整蛋糕沒有興趣的我，突然之間，好想整個CAKE，不知是否因為心情不佳而想食個甜點﹖

老人痴呆

近期發覺自己的記性越來越差，短暫的記憶只能夠維持約三至四小時，有時甚至只有短短一、兩小時；但對於以往的事宜則記得一清二楚：例如年前旅行時去過的一個小村落，同行的一大班人也記不得該村落的名字，但偏偏我自自然地說出名字來。
唉！一時擔心患有精神分列、一時懷疑自己會痴線、一時却怕會有老人痴呆..
太恐怖了！