我有問題﹖

一踏入公司唔夠兩分鐘就有勞氣嘢發生：
事緣之前唔批某某放鐘，因為唔夠人手，而且大家經已協議咗咩機制才放人。點知一個屈尾十，某某就經廢柴之同意下放咗鐘。廢柴重懶好咁，事後兩日才寫返隻字話俾我知。

問題一：某某完全唔尊重大家一直遵守緊個機制、唔尊重我的工作、甚至我個人。
問題二：而家係唔係我唔批，求其找阿水就可以自行決定幾時返、幾時放。
問題三：某某唔係第一次唔尊重我，上一次臨時攞大假及攞病假也是這樣。
問題四：廢柴更不可理喻，求求其其話批就批，有冇理個前因後果。

當然我有找某某問返發生何事。
一開口態度也不錯：某某，你係咪 xx (嗰日) 放咗鐘呀﹖
某某：係呀！
態度仍是不錯：我之前寫了比你，話當天唔夠人唔可以放喎。
開始有點激動嘅某某：我唔知喎！我問過廢柴，佢話夠人手可以放的。
因他的態度囂張，故我也有少許忟憎：之前大家也協議咗最低限度要 xx才可以放人。
態度越來越惡的某某：但係廢柴批嘅，我之前同廢柴講星期四前回覆我是否可以放，佢話OK我才放。咁樣你同廢柴講啦！我唔知你地IC點樣。
開始唔明點解會被人噴到一面屁嘅我：我一定會再廢柴講，但係我想清楚讓你知道個機制是怎樣，而大家也是這樣跟從的。何況我之前一早寫了給你，放喺你的抽屜內。
面紅耳熱嘅某某：我之後返來才開抽屜才知唔批。(大大聲兼好勞氣咁講) 我覺得你有問題囉！
一頭霧水嘅我：吓，我有咩問題﹖
大聲夾惡嘅某某：你以往也是將紙放於我檯面上，而今次你放喺我的抽屜內，所以我唔知。 我唔係日日都開抽屜架！
繼續一頭霧水嘅我：第一，我以往嘅proposal有時會放在你的抽屜內，有時也會放喺你檯面，並不是所有文件一定放喺你檯面；第二，你有責任每天去檢查自己的抽屜及紀錄表是否批閱等。而且我之前經已同所有同事講過，若果有時我 miss了批閱放鐘，同事可主動問返我是否miss咗 / 唔批 ；再者同工一直也遵守緊嘅機制唔好破壞佢。
某某仍然不滿，氣沖沖但語氣又細聲咗D咁，講咗句：『咁得啦！』然後就走咗。

直到而家，我都唔知自己有咩問題，點解會被人噴到一面屁，好似係我唔啱咁。我都唔明，而家做緊嘅嘢又煩又多，又吃力不討好，都唔知點解重要被人罵返轉頭。天理何在呀﹖