Yummy yummy！

朱古力火鍋令人再三回味，配以超甜的菠蘿同韓國超甜士多啤梨，簡直絕配。左圖似唔似千層糕或者布甸之類的物體﹖計我話，食朱古力火鍋最好是沾上1/3朱古力醬就最PERFECT喇！

係時候要做多D運動了。

團拜

久違了的團拜活動，數數手指，應該十多年沒有出席過。上一次經已忘記了何時了，只有印象婆婆還未過身前，上石硤尾村拜年的情景：大人打牌的打牌，細路就等大人散場後埋位疊麻將；之後大人就抽水食飯，細路就諗吓一陣去邊度睇戲同食嘢！(無錯，嗰陣時我仲係細路，可想而之，有幾耐無出席過這類型的家族活動。)
不過，團拜的活動都幾求其，好似大家交完換利是之後，食場素菜就各有各散，真的搞笑。

放心

終於講咗俾媽子聽我下星期去台灣了，放下心頭大石，而且Laylay及老豆還贊助了$1400台幣，好彩講俾佢地知，如果唔講就一來冇得拖行李，二來就沒有人贊助了。最搞笑的是大家一聽到台灣好似發哂矛，家姐同姐夫就話打包隻鵝、collen就話打包麵線、老豆話打包米包 (mos burger) 同豪大大嘅雞俾佢喎 (原來佢地對台灣都幾懷念喎！)

利是

做咗嘢咁多年，今年係第二年收到老細嘅開工利是。簡直係一大諷刺，唔知道嘅人仲以我剛出來做嘢，所以先有第二封嘅開工利是，實情是舊老細俾咗一年之後就無俾了，你話係咪衰格！利利是是攞個意頭，十蚊都好呀！不過，今年新老細都算係咁，雖然銀碼唔係大，但都好好喇！

台北，我來了。

昨天晚上仍然盤算著：『去﹖抑或唔去呢﹖又點同媽子講呢﹖(佢肯定話我又去旅行，好心慳返D喇！)』搞到唔係瞓得幾好。同自己講，若果今朝早上知醒起來，就去BOOK 機票。唔知係咪心理作祟，九點幾就起咗身，但係都係決定唔到去定唔去，在猶豫之際，我最終都出咗去。
去到旅行社，個職員幫我CHECK到有機票，但係因為台灣那邊仍是假期，所以未知有冇酒店。但好彩個職員好好人，佢幫我打電話去台灣嗰邊個AGENT度問，最終CONFIRM埋個酒店。3月1日，台北，我來了。

衝動了點嗎﹖

今天整天在囉囉孌，想著同一個問題：『究竟好唔好去台北呢﹖』問了多位人兄，大家也贊成我去，搞到我真的很有衝動去。但呢個決定係唔係真係好衝動呢﹖如果走了一趟，是否會好些呢﹖問題可否解決呢﹖我也不知道！我只知道現在的我是需要一個空間抖一抖氣。
不過話說回來，那麼遲還可以訂到機位及酒店嗎﹖明天決定到旅行社走一走，若果沒有機位的話，就可以死心了。

新年冇新氣！

今日之不過係年初五，唔知點解好似過咗新年好耐咁，完全沒有新年氣氛。人地話今年市道好咗，俾利是都闊綽咗，但點解我唔覺﹖每年都係得幾百蚊嘅利是，今年個形勢應該會幾嚴峻吓，因為D同事俾利是『縮沙』咗呀，有個重借頭借路唔派添！總之，新年完全冇新氣，不過究竟係因為今天嘅天氣唔好影響自己嘅睇法﹖定係因為係我心情唔好呢﹖

:(

唔開心，好想出走去台北，踫巧下星期有三天假，會否成行呢﹖

新春行大運

香港還有這些美麗的植物，你們喜歡嗎﹖


















特別是小菇菇，新鮮架，令人立即想打邊爐！

體驗第一次犯太歲嘅力量

黑仔果然逃不了，被人用汽水沾濕了牛仔褲、背包及鞋，但仍然要繼續上街，真的是黑中之黑！

心癢癢

好羨慕有friend去完台灣又去南韓，雖然是出trip，但仍有不少free time，而且是leave alone的，簡直perfect match！台灣可以去食街頭小食、去打書釘、食mos burger啦、最重要的是入義美貨；南韓就可以去看雪景、買laneige、食精美甜點、鹹紫菜等等。不過，sorry！通通不關我事。唔知我最快可以幾時去旅行呢﹖

dream house

今日得知一中學同學自己搬了出來住。
一、兩年前，我都好有衝動自己搬出來住，但其實又有要求：

1. 唔好太貴
2. 又要係港島區 (與前者有矛盾，因為港島樓通常都貴D)
3. 唔需要太大
4. 最好有CLUB HOUSE
5. 可以有D廣闊D、開揚D嘅景
6. 環境要清靜
7. 若果有露台 / 天台位就好了

SORRY！Those requirment are tooooooooo ideal and also impossible for my present suitation.

大年初一

恭賀新禧！
尋晚食完團年飯之後，去了維園及花墟。估唔今年有得行花市，因為之前落雨，我同自己講話唔會去行花市，廢事濕漉漉。但真係諗都諗唔到，年三十晚好好天時，仲好熱，我係著住短袖衫行花市的。不過，好彩著短袖咋，真係熱到飛起。而且行一條line，都要行足一粒鐘，所以行完一條line就去咗花墟了。花墟真的是好多花，我地買了串串紅、三色綉球、黃色跳舞蘭、百合花，還買了生肖飾物，我今年犯太歲呀！小心！小心！

恭喜發財！

大年初一，先同大家說聲：『豬年快樂！身體健康！心想事成！事事順利！』

左圖係我今年親手整嘅利是樹 (本來是想整搖錢樹架)，不過心意嚟嘅，送給大家啦！

年三十

用最短嘅時間去大掃除，只是『輕描淡寫』式地清潔一番。
今晚是大年三十晚，咁多年來好似係第一年，一家人齊齊整整地喺年三十晚正日食團年飯，以往不是要返工，就是大家唔想同其他人迫，所以以往也沒有於正日食團年飯。
今晚嘅菜式就有：

1. 鮑魚海參髮菜
2. 白切雞
3. 鹵水鴨
4. 燒肉
5. 咖喱蘿蔔牛腩
6. 支竹斑塊煲
7. 生菜
8. 牛鞦魚湯

本來諗住整一味『花開富貴』，但因為太多餸了，故放棄了！

希望新嘅一年，唔好好似豬咁蠢、唔好好似豬咁懶、唔好好似豬咁肥，淨係可以好似豬咁可愛、好似豬咁發 (發到豬頭咁)、好似豬咁皮光肉滑。

恭喜發財！

年廿九

人地年廿八洗白白，我到了年廿九動也未動過，厲害乎﹖
不知為什麼，今年的確比之前嘅新年懶，雖然有放假，但仍沒有心情去理會或打掃，真的需要年三十去賣懶乎！

敢幹嗎﹖

Laylay今天去了整激光矯視，雖然我也有近視 (應該說是嚴重嘅散光 + 少許近視)，但我沒有意慾去整，一來沒有多大的信心，畢竟也是於一個人體較精密的部位上動手術；二來我沒有這麼多錢 (兩皮喎！)，所以推動不到我。或者應說是我無用吧！

情人節快樂！

一個啞巴踫上一個失戀的，開始時沒想到有多大的感覺，還替別人製造機會，哈哈！之後的相處才發現大家的存在，奈何三年之後才得知大家真的有緣無份，最後要劃上一個沉重而悲慘的句號。

大家記住，情人節要快樂啊！

通宵工作

近期第一次開夜車，放工回家settle哂D嘢後，正式開工凌晨點幾，之後對住部電腦做到5點46分，跟住睡了4小時，又再爬起床開工。日子雖然難捱，但今次工作得開心，因為拍檔不錯，而且過程中好有滿足感，好似返返去以前嘅時光咁。

一廂情願

究竟係D同事唔用心去做嘢，定係我一廂情願佢地都要咁樣做嘢呢﹖明明開了會係咁樣安排跟進進食問題，最終又唔跟去做。咁樣我地有我地開會，佢地有佢地做，咁大家點樣合作喎！

痛苦加班

公司又再一次經歷痛苦了：因為又有人出水痘。
回想起上一次大規模出痘痘嘅日子，真的很痛苦，佢地辛苦時，我地又辛苦。希望今次可以快一點settle down。唔好咁大鑊就好了。

懶鬼

今日終於完完整整地做完了三個月以來，第一份嘅paper work，真的十分慚愧，做了咁耐，到而家先至滿足到某一part嘅要求，真是唔掂檔！希望可以陸續完成其餘嘅工作啦！

都唔知自己喺度做緊咩﹖

真的，2007年經已過了個幾月，但係我仍然喺度傻吓傻吓，完全唔知自己喺度做緊咩！好唔鍾意呢種感覺，好想實實在在搵返自己嘅存在。係時候搵返佢出黎調劑一下了。

生了沒有﹖

經已沒有一位台灣嘅朋友的消息一段日子，應該生了小孩了，但仍未有好的回覆，所以也不知道是男生，還是女生，希望快一點得知母子 (女) 的消息吧！而且對於BB的樣貌也有少少好奇心。

又被人鬧！

究竟係我樣衰，定係我乞人憎呢﹖今日又被人鬧。
雖然明知係人地片面，睇嘢只係睇某一部分，但係個心仍然屈住屈住。
佢究竟有冇了解過我地點解會有咁樣的處理方案﹖個過程係點又知唔知呀﹖無錯，你睇到嘅可能係d唔好嘢，好似成日都係罰罰罰，但前因後果你又知幾多呢﹖我需唔需要將我所做嘅每一件事也大大聲聲咁係你面前講一次呀﹖我唔係呢d人，唔講俾你知唔代表我無做到嘢。Come on！我亦唔會好似你咁喺度潑婦罵街，原諒你嘅無知，因為我知道自己呢一刻做緊咩！仲有，唔好聲大大咁講到自己有幾咁清高，唔該你睇下自己嘅嘢先啦，自己d嘢都未搞掂，就唔好做八婆喇！

平凡是福

簡簡單單的生活係每個人嚮往嘅，但現實嘅生活往往唔會俾你咁舒服。有人認為那些痛苦嘅事係個天俾你嘅一種磨練，對人生係一種考驗，克服咗呢D困難之後就會有彩虹，所謂嘅先苦後甜。當然亦有d人係先甜後苦啦，但因為每個人對於甜苦呢家嘢有唔同嘅睇法，所以永遠都覺得人地好D，自己嗰D衰D！對我而言，我唔需要太甜同太苦，唔需要大上大落，因為我只不過係一隻好軟弱嘅貓仔而已，平平凡凡就經已足夠。而家嘅我需要好大好大嘅勇氣才能站得起來，若果退一步，或者...............可以嗎﹖

澳門之旅 (二)

澳門去了不下多次，第一次感覺冇咩人，果真無選擇錯平日的日子黎，感覺悠閒。
而家D酒店真是越搞越掂，例如永利出面的大噴水池，每十五分鐘一次音樂噴泉表演，咩角度都影到佢嘅LOGO，掂！星際雖然無永利咁GRAND，但有GIMMICK，找個魔術師黎捉住D遊客開心下，令人印象深刻！萊斯坐擁整個海灣，戶戶有露台對住氹仔新橋，簡直DREAM HOUSE！
你話香港仲有咩嘢同人鬥﹖
豬仔都話冇眼睇！

澳門之旅 (一)

一行七人一齊去澳門玩兩day，本來應該好開心，但因有無端端多咗一位親戚一齊去，搞到又辛苦又唔盡興！
講個小插曲俾大家知呀！話說喺我地住嗰間酒店房內，出現一D意想唔到嘅『收穫』！其實間房都幾大，點知........喺我沖沖吓涼嗰陣，發現有一隻類似甲蟲嘅小強。當時咩『武器』都冇，唯有用花洒『射』佢，最後佢就被送往大海了。
咁耐以來，第一次住間酒店會有『朋友』黎探訪，都有D嚇人。

工作

有一剎那，對住老細D眼神覺得佢好陰險，平時嗰D虛偽唔知去咗邊。可能呢個係佢嘅真面目，又或者佢經已再扮唔到 『好人』。講真，有幾多料大家心知，做到幾多大家心照，取向係點唔駛講經已好明顯，只可以嘆一句：『我唔識做人！』