出師不利

為什麼每次出外工作，都總是下雨天﹖
每次也是搞到狼狽萬分﹖大汗疊細汗咁去到，唔污wer都唔去到，今日仲要去D非富則貴嘅地方添，真的超『火羅』！

恐怕我已患上旅行前恐懼症

突然之間有D後悔決定喺這個時候去旅行，因為今日收到一通電話，傾關於我假期後第一日返工嘅PROGRAM。雖然之前已分哂工，亦經已有心理準備D同事會搞到一鑊泡，但俾人講兩講，搞到我更加囉囉孌。不過，已成定局，可以點樣呢﹖

心痛

諗住去旅行要駛一舊錢，所以原本部相機殘殘地都忍吓先，況且部相機細細部我一直都好鍾意，點知尋日喺公司影影吓相，『bom』一聲，後來才發覺無咗閃光燈，應該喺閃光燈燒咗~~ 心痛！而家只可以喺光線充足 / 日光日白才能夠影相囉！
去旅行前又有多一個任務 ~ 買相機，但買邊部好呢﹖

期待嗎﹖

還有5天就出發去日本了，但仍然有好多嘢未搞掂，包括買保險、買accessaries、plan schedule、執行李...........，點解無預期咁開心嘅﹖唔知係唔係因為今次旅行前前後後嘅日子也要返工，唔通感覺唔到有咩放假feel﹖

忟憎的一天

得自己一個人返工，感覺好孤獨，而且好多嘢都唔順暢，先是無端端被人咬了一啖背脊、之後又被人撞同踢、又要睇住兩條友搞組、連唔係自己部門也要理埋。不過最可怕的是，是居然佢主動同我鎖門，諗起都有D心寒。

超緊張

被人識穿我今日勁緊張添。
不過真的好難唔緊張，因為要hold兩個meeting，之後又接二連三發生好多嘢：抽搐、制水、趕頭趕命、唔夠人、流血事件、在沒有預備之下搞活動.......，你話唔緊張就假了。

數學白痴一名

講個笑話俾大家聽下：
近期D日元跌咗，而咁啱又去日本玩，所以今日去了銀行兌換些少錢，今日個RATE係 [買出 6.8、買入 6.3]。假設我用$100港紙兌日元，應該有$680日元的，但我好白痴咁一直以為$680日元就相等於 [$680日元 / 100 *6.8] (即係$46.24港紙)，個數值相差幾遠呀，你地話好唔好笑呢﹖

儲錢大計

SARS時期喺『癢身』銀行買了一份儲蓄人壽，不經不覺仲有年幾就供完，今日去銀行兌換YEN時，有個SALES同我SALE另一份類似嘅物體，好快我就決定咗買，因為諗住嗰份又就黎供完，而且買多一份當係儲錢都好，如果唔係可能好快就會揮霍晒。所以話，人係要管束一下才OK！

努力的成果

今朝好俾心機去完成兩份paper，超有成功感，雖然搞到自己傍晚六點幾才食lunch，但起碼自己可以清一清D paperwork，如果唔係又被人吹囉！不過最大的原動力是：老細唔喺度，大家也輕鬆一點。

對不起

對不起，我不知道為什麼自己會這樣子的﹖
我不想是這樣的，我也想好好對待你，但近日不知為什麼會無原無故的發脾氣，小小事也會衝動起來，好想發洩出來，變成動不動便大聲叫喊、發怒。發完脾氣後我也不好過，現在的我也不知在做什麼 :( 希望你原諒現在的我吧！

潛意識做賊

昨晚發了一個夢：
一個人在行百貨公司，行到超級市場附近，選購了不少嘅貨物落購物車內，其後取了一盒特色糖果禮盒，連同之前所買物品嘅膠袋一併抽住 (禮盒並沒有放入購物車內，故意將一個二個膠袋遮住那盒糖果)，便到收銀處付款。當時我只取了購物車上的貨物來付款，『全心全意』去偷那盒禮盒出去。之後成功地過了收銀那關，便一直向前走。走了一段路後，有兩名穿著便服、戴住黑超嘅男子 (仿似自由行阿叔咁) 上前，用手指大力篤了我心口數下，並謂：『小姐，你有D嘢未俾錢喎！』在慌亂之際，自己不其然就夢醒了。
好可怕啊！在夢中，自己好肯定是全心去偷嘢，完全沒有覺得什麼問題 ~ 沒有思考對與不對、沒有想過後果、沒有任何的爭扎、沒有一絲歉意.........

又一樣煩嘢

諗住plan好晒一定萬無一失，點知嗰日唔駛返。好衰架，而家又要重新計劃過，點算呀﹖好煩呀！次次都係突然其來，叫人方寸大亂。
講開plan嘢，死啦！去旅行D嘢都仲未搞，還有差不多一星期就出發了，到時唔好淨係指意我呀，我唔會好似之前咁well-planned，如果真係靠我的話，可能都係隨心所欲而已。

成功取了匯豐卡

由好想申請到填form、再由無意中喺街頭展銷會度申請到寄文件、跟住又由超煩要俾百幾樣文件 (employment letter, salary advice & bank statement......)到諗住放棄申請、最後由求期寄了一份文文件去到正式取卡，足足搞咗成個月，真係得來不易！不過，而家取了卡又再有另一個問題 ~ 就是要努力簽卡去換禮物囉！

鬧劇一場

真不明白，明眼人也知道邊D人喺度搞氣氛、邊D人先至係大嬴家，但係依然有D人覺得係自己嘅功勞，OK！OK！俾你俾你！不過最搞笑的是，喺沒有夾過嘅情況下，大家選擇唔回應，PERFECT MATCH！

近期熱門旅遊地

無意中同一個中學同學傾開計，原來大家也plan緊去日本，不過她是出年三月去看櫻花，而我就是下兩星期就出發。既然大家有共同嘅話題，咁就傾咗成粒鐘，仲要約出來交換旅遊資料。不過正式黎講，係我過料俾佢，因為她從未去過日本的。真係估唔到，而家後生嘅一輩竟然有人未去過日本。好！喺日本努力搵多D料返黎貢獻俾這兩小口先！

執手尾

真的被人氣壞了，要多少細胞才能頂得住﹖
應該是昨天嘅工作，但却遺忘了，搞到所有schedule混亂咗。雖然佢有補做返唔記得咗做嘅工作，但係又遺忘咗另一些事宜，搞到下一更嘅我混亂非常。好彩我看一看，若果不是又被人線了一鑊都唔知。
另一件事仲大鑊，就是4百幾蚊嘅問題。唉！咁貴，點同人交待呀﹖個同事真唔生性，自己睇4百幾蚊都會叫晒救命，更何況係佢地！好心唔知都打個電話回來問吓喇！

完全黑仔

今日無論去到邊度排隊，前面嘅人均有問題，包括地鐵排隊入閘、過e-通道、喺吉吉島排隊俾$買嘢喇..............，均有大大小小嘅阻滯，一係條友嘟唔到張八達通、一係個粉人唔識用e-通道、一係條西裝友又嫌人地個膠袋唔實淨，總之一句講哂：『超級黑仔！』

被人呃咗 ------- 半年後才發現

大約喺半年前，去了屋企附近一間舖頭買了兩粒電，諗住整落部即影即有相機度用，點知毫無反應，以為部機壞咗，仲唔開心了一排 (因為勁鍾意部即影即有)；今日心血來潮，又或者係死唔心息，去另一間舖頭買過兩粒電回來試試，點知又WORK喎，先至發覺應該半年前的那兩粒電係廢嘅。真搞笑，被人呃咗到而家才知，好彩當時無掉咗部機去，如果唔係份大業便有D缺憾！
我以後也不會幫襯那間舖頭了！

無聊的1天

昨天打的部落去了哪裡去，完全upload唔到，why why why﹖﹖

好累好累，今天完全沒有心情做嘢，淨係好想好想訓覺，提不起勁來，點搞呀﹖

飛蛾大阿哥

回家途中，發現一隻超級大嘅 "飛蛾" 嘅物體，唔好話我誇張，真係成隻手掌咁大架，見到都有D驚，睇黎佢都幾好食好住！

confirm囉！

好消息，終於取到package嘅機票同酒店單。有了這些到手，才感到真正成行。
日本，I'M COMING！

值得紀念的一次會議

很久很久也沒有開過一次那麼愉快的會，平日死氣沉沉、只有我講無人講嘅會議，今天却變成大家開開心心、有說有笑的會議，雖然仍看然有人打呵欠、不太給予意見，但仍是我希望再遇見的會議。

工作忙忙忙

連續三日開會，好想叫救命，一大堆嘢等住我做，之後仲有新嘢加上去，都唔知幾時有時間可以plan旅行D嘢。雖然今次可以唔駛點理，但我都想可以玩得開心D、難忘D！期望可以有神仙打救才搞得掂吧！

估吓係D咩﹖

大家估唔估到係D咩黎﹖

咪係我尋日嘅戰績，相片上的傷痕經已冇咁恐怖，真實隻手瘀瘀黑黑、紅黃紫黑交集其中，今日仲要被人觸踫多次，超痛！

不過，有樣嘢CONFIRM咗，放下心頭大石！

好想講：『XXXX！』

一次又一次勞氣，一次又一次『嗎差』。仲話自己係PROFESSIONAL，連最基本嘅協調也不懂，真的好想爆粗。數數罪狀就知我地有幾激氣：

1. 人未到齊就做簡介，仲要話先開車；
2. 人數有變也不做調配；
3. 不同活動就不同人，超亂；
4. 下大雨也不理會；
5. 事先唔作聯絡，搞到要下大雨行5分鐘；
6. 經已落湯雞，還在影video；
7. 一組有成26、7人，唔理人生死；
8. 一時一樣，又話喺度等，不消兩分鐘就講上車等；
9. 明明分咗組，又拉人走；
10. 人地喺度安頓緊小朋友，又喺度煩人；
11. 明明叫人去準備，之後又叫人入返去；
12. 應該先尊重家長俾佢地玩遊戲先，但反而叫同事玩先；
13. b-day禮物用雜誌紙包百力滋；
14. 唔理人地俾佢嘅意見 (嗰D人係佢請返黎架喎！)；
15. 將佢自己請返黎嘅人當作係家長；
16. 講D令人尷尬、難堪嘅說話，如『精英』、『媽咪 (契媽)』；
17. 一次過叫兩個人表演，唔理當期時同事嘅任務 (好彩嗰兩個人都有D知覺)；
18. 我同個家長傾緊，而個家長亦想傾下去，佢竟然強行拉人走；

多到都記唔哂了，不過淨係以上嘅嘢足以死哂D細胞。

還有今天被咬了一口，即時有牙印、紅腫，勁HURT (包括心靈及肉身)！

地鐵一幕

喺地鐵內，真係可以看到人生百態。
今日喺尖沙咀地鐵月台等緊車之際，見到一個黑皮膚、講英文的旅客向身邊一個剪skin hair、頭頂架著太陽眼鏡、衣著前衛嘅年輕人 (應該有二十五、六歲) 問路，隱約聽到個黑人問個後生仔，去『victoria park』是否於這邊月台上車。之後見到個後生仔支吾以對、面露難色，之後還手指指，指向月台上面嘅方向 (即係出閘口那層)，我即時想像到：『佢唔係叫人去客戶服務處問呀﹖』
無論你身穿什麼名牌、打扮得幾咁前衛都好，一出口就知道你係咩料。唉！連victoria park係咩 / 答唔到人係唔係喺這邊月台上車，幾潮都無用，仲影衰晒d香港人。

你想要的是什麼﹖

工作了十三小時，感覺很疲累。之後還收了一個奪命追魂電話，只不過是兩星期而已，就宣佈唔玩，兒戲麼﹖究竟想要的是什麼﹖到幾時才會甘心停下來﹖相信只有當事人才知道！

女人好一個爛藉口 ---- 又去shopping囉！

的起心肝去執拾冬天衫，發覺原來有許多衫過去一個冬天是沒有著過的，感覺有點奢侈。雖然這樣，但仍有意欲去shopping，因為shopping係工作嘅其中一個原動力；而且還是唔開心嘅趨化劑。

著數一則

近期匯豐銀行狂sale其信用卡，本諗住都申請返一張，點知交了部分資料後，又再request喺兩星期內再寄salary advice、employment letter同salary bank statment。起初諗住咁鬼煩，唔再申請，於是就無理會嗰兩星期嘅deadline，由得佢cancel就算。
點知今天回家後，收到匯豐寄來的信，又話俾多五日寬限期交以上的文件，否則當作取消論。其實匯豐都希望多d人申請，點解又set咁多限制喎﹖不過，最驚訝的是，匯豐給了兩張百佳超市$20禮券來 (這份獎品應是有繳交文件才有的)。嘻！咁就無端端攞著數。

有心事嗎﹖

昨晚凌晨三點幾瞓，點知囉囉孌瞓極都瞓唔著，凌晨四點幾起身睇電視，睇到五點幾諗住試吓訓唔瞓到，點知六點鐘被人熄咗個冷氣，最終一D都無瞓過。晨早六點幾就上網、七點幾就吃早餐，今天餘下的時間可以點樣過﹖連續兩日都無覺好瞓，咁樣點捱下去呀﹖

煩擾 >>>>>> 精神病

一早被人嘈醒加熱醒，又開始那些煩擾的生活了。

最近得知媽子一位朋友曾經被他的兒子弄傷，本身兒子是有精神病，但情況似乎日漸嚴重。歸根究底，兒子的病也是被其母親所『害』的。由細到大，日哦夜哦、又要慳這又要慳那、又將所有希望寄託於這個仔身上，諗返起都幾可憐。如果我是那個兒子，我必定會一早離家出走。最可悲的是，母親仍然放不開 / 接受不了兒子患有精神病，怕別人知道這個事實，寧願涯貴醫生費，也只讓兒子看私家精神科醫生，她的理論就是：『若去看政府醫生，個仔以後就被人label成精神病人，便會找不到工作了。』令人擔心的是，倘若有一天兒子又再一次弄傷母親，根本沒有人可以幫到她，因為警方、醫院、家庭服務社工、醫務社工、甚至於鄰居等，從未有這方面的資料，那怎樣可以於危急時幫助他呢﹖

心頭好

行來行去、左度右度、思前想後，都決定唔到買唔買這條手鍊。

買：因為它靚、好sharp、好特別、好grand；

唔買：因為它只不過是珠意繩，却要2百幾蚊、自己又唔係成日可以戴到，好似有d浪費；

最後得到Jolaylay嘅支持，咁就買咗，兼且成為最近的『心頭好』。

18年前的今天

18年，不知不覺地過了18年。18年的時間，足以將一個嬰孩養育成一個成人。到了今天，仍然有一大群人歇而不捨地繼續爭取18年前的申訴，不得不佩服他們。昨晚行經維園時，腦海即時浮現了整個足球場上坐著手持蠋光的有心人嘅畫面，一條條長長的標語、一個大大的台板，為今晚的晚會作好準備。想深一層，當年的吾爾開希、柴玲、王丹往了哪裡去﹖

星期日的中環

昨晚睡得很少很少，今天有點wing wing地，好彩有個好同事幫我分擔一下工作，又等埋我先收工，真的感謝他。


唉，星期日中環經已完全被外地傭工『佔據』了。因天氣大熱，只不過想去KFC買杯飲品，但整間KFC不止被外地傭工佔滿，連D staff也感到疲憊不堪，甚至工作得發脾氣。只不過想買杯飲品，前面只不過排上兩個人而已，却要排15 mins，勸大家一句，千萬不要星期日到中環的KFC了。

Jolaylay回歸了

一個月嘅時間話咁快就過去，今天Jolaylay經已回香港了，可惜我今天需要工作，故未能即時分享她的開心旅程。佢嘅歐遊的任務完成，唔知幾時會到我呢﹖

工作得快樂

與同事一起通宵工作，難得有個啱傾嘅人陪我，當然咀巴合不上來，一傾就傾到三點幾，之後整理一下後，躺在床上也繼續傾下去，直至傾到大家沒有知覺之下，就不知不覺睡著了。雖然過程中連最重要的東西也沒有做到，但感覺超開心！

定下目標

決定咗由今日起做一樣嘢，當係preparation又好、又或者第二時用作回憶都好，希望唔會爛尾啦！
:) hehe，心情有點興奮添！

寸我﹖

一早就被人寸，雖然係我自己打電話去嘅，但都唔可以因為咁而講到我好似無做嘢咁。當然我唔會就此罷休，不甘示弱地暗寸係佢地整慶個仔上車，搞到個仔喺度發晒脾氣。佢即時無聲出，只回應辛苦晒我放假都要我做嘢，你知就好啦！我唔介意放假做嘢，但放假被人寸就唔多『老黎』，影響心情嘛！唔通又要去SHOPPING﹖