該時候了！

拖拖拉拉了好一陣子，是時候做個了斷了，雖然心情反反覆覆兼有點不捨得，但總好過而家什麼也不是；雖然很沉重，但總好過白白虛度時間。

什麼意思﹖

為了昨天的投訴，今天仍是悶悶不樂。其實都唔係我搞出黎，但心情仍然久久未能平伏，特別是得知老細事先同個搞鑊泡嘅同事張揚，好等佢有得防範一事經已好嬲，明明佢話由我負責同個同事講，而家又咁樣，咁你當我係咩呀﹖有無尊重過我呀﹖慌死我會殺咗個同事咩！我的存在有何價值﹖

又被人投訴

點解次次都係咁，一個二個搞出來嘅蘇周屎又要我地食哂，因為一個同事不負責任的說話，搞到連一個平時好好人的客都投訴，第一個梗係我食喇！死人頭！同老細講又不正視，what can I do?

無聊日記

今朝晨咁早就被迫出門口，因為有個親戚話要上來我地屋企坐。為咗貫徹我唔見人嘅性格，所以我就一定唔會喺屋企囉！但係咁早又可以做D咩呢﹖第一件事梗係食個早餐先啦！諗來諗去都唔知食咩好，最終選擇了『太興』。入到去之後，有D後悔揀咗佢，因為無咩好嘅選擇，唯有求其點了餐蛋麵、凍奶茶。配合後悔嘅大方向，個早餐無咩驚喜，而且個奶茶仲係漏單添！總之大打折扣喇！
食完早餐之後，行了一會就諗住搭車落銅記轉車返工，點知喺架巴士上見到媽子同個親戚。心裡想：『咁快就上完屋企喇﹖知道我唔一早出來啦！喺間房瞓多一陣，等佢地走咗才房！』心裡經已咒罵班師奶。

我剪了個新髮型

其實好多人都話我原先個頭都OK，可以暫時都唔駛剪住，不過我又想轉一轉形象，之前好似好悶咁，所以就決定今日去剪個頭。
嘻嘻~！大家估吓我剪個咩頭﹖就是少少BOB，加少少草菇，總括而言，又是一個『小丸子頭』囉！

自然教育科

各位同學：
今日要同大家上自然教育科。為了讓各位同學更了解自然生態的實況，我地一早沿畢架山上，直往大潭水霸。這條行山徑係我地細過成日去的，除了近屋企之外，仲好好行添。自從出來工作後，經已越來越少上去了。今日再上去，令我勾起細過上去行山、燒嘢食，好懷念呀！等我遲D又搞一次燒嘢食先。
沿途好多樹、花都經已枯萎，不過仍有不少靚景嘅！Let"s share！

又係攞你命嘅玩意

麥當當今期又有新玩具換，就是KERORO軍曹，一共有八款，當中有四隻KERORO，一隻係球星KERORO、一金一銀的KERORO、同埋最騎尼嘅行政人員KERORO，還有GIRORO、DORORO、KURURU，當然有最靚靚嘅TAMAMA啦！

http://www.mcdonalds.com.hk/chinese/kids/keroro/

八婆

老細同阿某某傾嘢，舊飯就喺附近扮影印同做嘢，喺出面兜兜轉。正因為咁，更加突顯佢心虛、無料、廢柴，驚人地會講佢D咩嘢 / 講一D嘢會影響到佢。講真的，有咩好偷聽呀，老細同個同事講咩關鬼佢事咩，就算好想知道人地講過咩、傾過咩，都理應大大方方，唔好做埋D咁低莊嘅行徑。與其浪費D時間做D咁嘅嘢，不如俾心機做好自己D嘢先啦，連份minutes都打到錯漏百出、語句完全不通順，都唔知當年點考會考﹖

發悔氣

沒有想過會對他發悔氣，當時只不過是火遮眼，完全沒有想過那句說話就衝口而出，我諗當時佢都幾唔開心吓。印象中，他好像是回應了一句，但我發完悔氣就調頭走，故沒有聽得見他說什麼；不過，換轉是我的話，我聽見那悔氣說話也會感激氣，因為根本唔關大家嘅事，只不過係其他人的問題，點解要搞到我地兩個都唔開心﹖
But, 我有勇氣同佢講 "sorry"麼﹖

感動

今天開工時，突然有人從後拉一拉我衫尾，原來是一個學生 - 一個我最疼錫的學生。我蹲下來，望著她，她細細聲的對著我說：『我走喇！』之後我問她去邊度，佢就答我：『我畢業喇！』我問她知唔知畢業之後會去那個中心，她並不知道。看見她扁扁咀的表情，鼻子不禁有些酸。其後我對她說：『不如遲些帶你出街玩喇！好似上年咁去食聖誕大餐啦！』她即時展露出平日的笑容，攬住我的膊頭說了一聲：『多謝你！』整個人也甜起來。

沒有想過她會親自對我說聲：『我走喇！』、沒有想過她走後會是怎樣。曾經有同事問過我，我那麼疼錫她，當她離開時，我會怎樣。說真的，我不敢想像..........，只知道今天的事令我很窩心，希望可以多些帶她出去玩。

越來越唔識做

或者應該說是越來越唔知自己在做咩，點解明明能力可以，又有天時、地利，唯獨欠缺人和，就影響了整件事的發展﹖點解有D人明明能力唔OK，又不利天時、不利地，只有人和單一原素，就可以無憂無慮、發展順利﹖

投票日

大家今日有冇去投票呀﹖
我當然有啦！仲要係返去自己間小學投票添，感覺有d得意。雖然唔知邊個會當選，但有一段小插曲令人發笑：

話說朝早同媽子、細妹一同行去投票站，沿途大家經已討論緊投邊個 (其實得兩個候選人揀而已，一個唔知係咩水，另一個喺本區紮根了十幾、廿年)，媽子就話：『緊係投另一個 (唔知咩水嗰個) 啦，雖然明知佢輸緊，但為免佢輸得咁慘，投佢一票將票數拉近D！』大家一心以為她會投阿咩水，誰知晚上細妹講返原來媽子都係投俾紮根廿年嗰個議員，佢講到似行行，原來佢只不過想吹吓水而已，想改變吓我地喎。

你話搞唔搞笑呢﹖

電視的而且確係香港人的食糧

今晚同家姐、細妹佢地去銅記打邊爐。八時多就去到，經已有一大堆人在門口，為的是吃特價火鍋。喺等嘅一小時過程中，大家堆在酒樓的入口，為的是看無記的萬千星輝頒獎禮。本來對此節目沒有多大的興趣，但無無聊聊又望下，其實一如以往的賽前預告，大家只不過是分豬肉，人有佢又要有，原來一大班人看賽果都幾搞笑，好似個個都想攞張望到電視嘅檯坐、見最佳女配角係陳法拉攞的時候，大家一同起哄，可想而知大家有幾咁失望，不過都預咗啦，『皆大歡喜ma』！

我家老細係D咁嘅人

討厭！極之討厭！
昨天一輪勞氣嘢之後，今天見到老細唔係幾想睬佢，心裡正盤旋著是否應該同佢講佢，身為老細嘅佢唔應該好似尋日咁死撐一個同事，而又喺無理據的情況之下，將以往開會傾出來的方案推翻。連佢自己講個理由都有D勉強，對真正工作無好處，亦對我地好唔公平。點知佢今朝突然無無聊聊地走來說：『你間房個人仔board整得好靚喎！』好似好想ICE-BREAKING咁，之後同另一個同事講：『你有冇睇過呀﹖好得意架！』我都無佢咁好氣，只求其回應一句『係呀！』就繼續做我嘅嘢。我都知我無禮貌，因為如果我係老細當時聽到個同事咁回應，都幾hurt！但我有咁嘅反應都有原因，除了因為昨天嘅事外，今朝都發生另一件事。
一早老細走來同個講，說找一些細路放學留校做吓功課、玩吓電腦，我心諗若果唔太遲返都OK嘅，但唯一的是要分散D，唔好迫埋一間房嘅細路，因為會影響其他流程。點知佢揀來揀去都係叻仔，一時又話個仔情緒唔OK，學校都唔建議；一時又講個仔唔係幾好，總之揀來揀去都係平時有許多活動嗰D，忽略一D有真正需要嘅細路。最終老細揀嗰D咪又係迫埋一間房。我見佢scan來scan去都係D仔，我就話會唔會揀D女仔，分散吓之後流程嘅負擔，佢好似千萬個不願意，又話驚喺車上有意外，又依依哦哦咁，駛唔駛咁偏幫呀！我D仔都係人黎架，老細你唔鍾意佢地都唔好唔尊重佢地。其實活動後學校都有人跟車架，講到我D仔會食咗D女咁，根本佢都唔係諗D細路有冇得益，因為我問其實學校係想當功課輔導班 (幫一些喺課堂上學得唔係咁好嘅學生補習)，還是教他們新嘢 (即是俾一些叻嘅，再喺課堂以外俾D額外嘅嘢佢地)﹖佢都答唔到我，連做咩都未搞清楚就應承學校。
你地話啦，咁嘅老細值唔值得睬佢呀﹖

開會來幹麼﹖

真的不明白，一個老細係咁，再來另一個老細又係咁。點解一個二個開完會，傾過嘅嘢又唔算數，咁做咩要浪費咁多時間去開會。約了一點開會，次次都係半小時之後才開始，係咁就唔好叫我咁早返啦！之前大家妥協 4：3.5：3嘅基制，而家又話唔制，你估細佬仔玩泥沙，唔鍾意就推倒它﹖難得我地老細又一齊玩沙，都唔知點做management，唔識做就早點返歸。不過最好笑的是舊飯竟然話：『要sa姐留喺我地個組，又要al星期五、六、日入房幫手。』，以及 『俾唔駛讀書嗰D入我組。』白痴架！咁都講到出口，真係要拜佢為師。
係咪應該要看化一點﹖

別人眼中的我

真不明白，為什麼會這樣看我﹖
先是一個，走過來招呼也不打，就說我個仔有某某問題，根本也不了解實際的情況，亦沒有看過這個仔一眼，就單憑其他人的一句說話，就走過來『質問』我，難道我不關心個仔，難道我什麼也沒有做過麼﹖
另一個，就不用多提了，莫非我於別人的眼中是這樣的麼﹖

摸不透的人心

一連兩天的作反日又展開了，因為老豆同媽子去了大陸，我同Jolaylay又可以攪攪震。雖然仍然要返工，但起碼可以free一點，同埋唔駛一早被財經台的報導嘈醒，都心滿意足lor！

今日老細同舊飯又唔知係度傾咩，當我一入內，二人即時將音量較低咗，而且好快就完結那段對話，好令人懷疑二人身有屎。Anyway，我而家都唔係好理老細同舊飯，只要佢唔干涉我，我都費事理佢地，以免自己勞氣。不過ED今日有份嘢明明傳閱俾大家睇，點知佢又突然收起咗，叫我地唔好俾舊飯睇住，何解呢﹖一時又幫舊飯幫到盡，一時又好像朝向我們這邊，咁究竟ED嘅想法係點呢﹖

一頓豐富的buffet

捱了一天的肚皮，晚上同Jolaylay & Collen去了九龍酒店吃消夜buffet。細個的時候，經常到九龍酒店吃buffet；隨著近幾年的選擇多了，故九龍酒店已是大後備了。不過相隔一段時間，原來當中是有驚喜的。百多蚊的消夜buffet，選擇的種類同三百多蚊的晚餐buffet一樣多，而且質素都唔差，有海鮮粥、生蠔、刺身、甜品......等等，難怪在星期日晚尖沙咀的街道沒有太多行人的同時，反而九龍酒店的buffet counter却熱鬧得很。

久違了的老地方

一個以前好鍾意嘅地方，近幾年好似遺忘了它，完全沒有探訪過它。今天心血來潮，舊地重遊。其實該地方沒有太大的變動，仍然有我喜愛的事與物，但重遊過後感覺很痛！

一套美式悶戲

好地地一天的假期，被老爸、隔壁D八婆同整廁所天花D工人搞到勁忟憎，原本經已心情不好，火上加油的情況之下，唯有避走出街逛逛。無無聊聊的情況之下，走入戲院睇了一套胡鬧的戲『WEDDING DAZE』，男主角JASON BIGGS一開場就扮成CUPID，諗住同女友求婚，點知AUDRA BLASER未及回答就死去了。一年之後，JASON被老友誤點之下，就求其喺一間餐廳內，找了當侍應生的ISLA FISHER求婚，之後就展開一連串無聊的劇情。沒有什麼特別的戲、沒有什麼驚喜，只覺得AUDRA有點像日本的宮崎葵而已。

病情日漸嚴重了

又是情緒病發作的日子，不知為什麼今天開會時竟然一開始就炮轟D下屬。罵的內容係幾個月前經已想罵關於工作質素下降的問題，本應埋沒了幾個月，亦應該淡忘了，但不知為什麼今天又突然衝動地說了出來。既然說了出來，本應算了吧；但之後又後悔，搞到心情一直沉下去。明明平日放工搭的車偏偏不上，走去搭一架繞路而行的車，為的是讓自己settle一下。為什麼﹖想了許久也想不通，只知道是自己的病發的時候了。

開心的一天

人一有機會便會躲懶，好一個例子就是本人了。一唔寫開blog就會無咩恆心去寫，希望唔會爛尾！
今日好開心，同班細路去燒烤，雖然佢地的耐性唔夠同燒唔晒D食物，但過程真的很搞笑，叫佢地包蕃薯、包粟米，而且佢地認路都好勁，好似好耐都未試過咁開心了；不過好似令到ED返緊工咁。

歐遊2007 (十一) - 首尾呼應 = 領隊黑仔﹖

DAY 10 - 14/10/2007 (日)
第十日其實是在航班上渡過，起機前擾攘了差不多半小時，原先以為有人唔肯將個袋放上行李架，因為有幾個大粒嘅地勤上咗機，好似嚴陣以待咁。後來發現是有一個座位未能調較至垂直 (即座位只能往後)，故又要call人來整，所以大家也有等到發呆。
擾攘多時，總於可以起飛了，差不多下午六點左右就到了香港的機場。今次我地要坐2-4-2的航機，故此被安排了坐中間那排4人座位其中的三個位，都算OK啦，因為起碼有一邊唔駛被人阻住。媽咪上機之後就大覺瞓，反而我有點不自在，囉囉孌也睡不著，所以什麼飛機餐、飲品、小食我也通通掉進肚皮內。

唔知大家仲記唔記得，我地去程時有一個團友唔咗件行李 (實情是無跟機送過去)；但唔知係個領隊黑仔、定係D團友不好彩，回到香港又有另一個團友等了許久也未見自己件行李，到所有人取回自己的行李後，他仍是未攞到。不過之後在機場巴士上已見佢地兩公婆攞返件行李出來了。



旅程後記
是次十天的旅程真的很開心，能夠去到一直以來好想去的瑞士、英國同威尼斯，的確令人感到興奮。雖然有不少地方只可以逗留一段短時間，未能真真正正看得晒當地的風土人情，不過對於歐洲行的一個簡介來說，也是不錯的選擇。如果俾我揀多次，我也會於第一次遊歐洲時，先跟旅行團，再找一些特別的地方日後自己去一趟。

回港之後，將部分相片沖晒出來，看了又看，完全愛不釋手，因為爸媽的笑容真的很可愛、很燦爛，令我覺得是次旅程真的很值得。之後傳閱相片予同事看，同事均說爸爸很像小丸子的爺爺，繼我剪了一個小丸子的頭 (其實而家唔似了)，我的家又多了一個小丸子家族成員了。

歐遊2007 (十) - 站在西歐街頭的最後一天

DAY 9 - 13/10/2007 (六)

今天係行程的最後一天，下午便要到機場，所以早早就起來，完成最後一天的西歐遊。今天的目的地係英國的溫莎堡。英女皇真的有『菲士』，佢將通往溫莎堡的路設計成一條長長的路，美其名為『長壽路』，喻意好明顯啦！

下圖係英國查理斯皇子同第二任老婆結婚的地方。因為查理斯同卡米拉都離過婚，故不能正式入教堂，所以就選擇了一個小小的禮堂內結婚。

大家睇下，一朝早就有好多人喺門口等緊開門，而家只不過係8:30a.m.左右的時間，我地都係第三隊團隊入內的，聽聞一陣間就會有好多人架啦！所以大家都好早好早排隊入內。

沿路有許多大大小小、用石磚砌成的城堡。其中有些城牆是有些特別設計，大家估下係要來做什麼﹖

開估啦，其實係防盜眼來的。那條幼幼的隙縫是讓入面的人看看有否外來者入侵，而出面的人是完全看不見的，所以就像我們現代的門眼一樣，好讓我們看看是誰人造訪。

城堡入面供人參觀的有瑪莉皇后的玩具房，將她兒時玩過的玩具展覽出來，並將她兒時住的大屋縮小製成模型；在兵器房，展出歷代使用過的兵器，其中有一支火槍的槍頭是心型的，據聞是射向一些壞心腸的人，喻意將他的惡意溶化；還有客廳、飯廳、客房、寢室、畫廊、會客室等等，內裡更展示了歷年來所用過的餐具，有些到而家英女皇都會用來招呼國家的元首、總統等；喺其中一個飯廳內，展示了一張50人的飯檯，而該飯廳的地下是鋪上一張無駁口的地毯。據聞當年有一個記者入溫莎堡參觀 (那時還是用『pop』一聲的古老相機)，她一不小心被一些線絆倒，因而引起火警。當時王子表示什麼也可以不要，唯獨是那張地毯一定要取走，因為是很真貴的；但試問一張密鋪差不多一個籃球場面積的地毯，可以那麼容易搬得走麼﹖所以自此之後，入溫莎堡內是不可以影相同喧嘩，所以而家大家只得過聽字，無相睇囉！

參觀完溫莎堡之後，又是自由活動的時間。旅遊車又車返我地去唐人街附近，因為那裡較多食物的選擇，而且又鄰近出名shooping的麗晶街同牛津街，所以就將我們拋下在這裡。我地午餐就選擇了吃越南嘢。說真的，雖然貴了一點，但真的不賴，比香港一些馬馬虎虎的越南餐館出色得多。吃完飯之後，行行逛逛就消磨了一小時，當中發現了不少顏色豐富的蛋糕，唔知會唔會好似香港嗰D，好睇唔好食呢﹖而且英國都有香港仔牛扒屋喎，唔知會唔會帶有避風塘味的牛扒呢﹖

之後，領隊又帶我地搭公共交通工具回酒店取行李，今次是搭巴士。唔知大家知唔知，其實香港D巴士都係喺英國購買回來改裝的，所以上了英國當地的巴士有點似曾相識的感覺。

隨即我地就出機場。英國希斯路機場擠滿了人，因為有兩大原因：第一，因為要辦退稅。好彩我地跟團，領隊幫我地睇清楚退稅單是否填好，然後幫我地收集好，交俾當地counter其中一個華籍服務員一次過辦理，免却我地排上一、兩小時的隊伍。第二，英國機場不會於大家check-in時告知大家的上機入閘的編號，要大家於擠於中央候機室內等到差不多起飛半小時才公佈上機閘口，目的係要大家於候機室內的商店消費。這樣的做法的確有效，因為真的不少人在shopping、食嘢、買朱古力、買書等，連其中一個團友都喺這個時間買了一個BURBERRY，真的用心良苦。

到了入閘、過X-RAY時，發生了一段小插曲。事緣英國機場要求『One man one bag』的機制，限定每人過移民局時只可以取一個袋，不論你個袋是大是小，抑或是你過了移民局之後將之拆開成十個、八個袋也ok，總之係過移民局時必須要『one bag only』。於是我將一個背包交予媽媽，而我就取了一個handcarry過關，點知過X-ray時， 紅燈著了。隨即有人叫我打開個袋，心裡想：『無理由架，個handcarry內裡全都是手信同食物，點解會響呢﹖』當然最終什麼也沒有找到啦，不過就被個移民官員笑我成袋也是食物同手信添。

歐遊2007 (九) - 終於去夢寐以求的英國 (最後一站了)

DAY 8 - 12/10/2007 (五)

今日晨咁早就要起身，因為朝早要去搭『歐洲之星』，morning call 係5:00a.m.呀。

之前好想好想搭『歐洲之星』，其實都唔知點解，淨係覺得好想好想搭而已；但搭完之後又覺得沒有大不了，仲差過香港D電氣化火車，而且車速有點快，令我完全看不見窗外的風景 (不過就算開得慢，窗外只有一片片農地而已)，反而喺日本京都搭去東京嗰程火車都開心D！

到了英國滑鐵盧車站，感覺多了一份親切感，話晒香港都曾經係英國的殖民地，一事一物，一車一人也有點熟悉，再加上可以同人傾吓講吓 (因為法國D人講法文、意大利人又講意大利文)，所以都係英國舒服D。

入到英國第一站就是去唐人街吃午餐，今天是吃港式點心同炒粉麵，都幾OK，同香港的有得fight。吃完午餐之後，就去出晒名的『大英博物館』。它之所以出名，是因為內裡展示的全是賊贓，可惜好多展品都唔係原整的，因為了方便運送，又或者係方便偷回來，所以都係無頭、無手、無腳、穿孔等等。由於唔夠時間，只係可以行四大文明古國的展館，希望第二時有機會自己來英國行過夠。

去完大英博物館之後，就開始展開走馬看花的行程，什麼國會大廈、西敏寺、大笨鐘、聖保羅教堂、白金漢宮、塔橋......，每個地方只逗留二十分鐘就上車，真正的『旅行團』。到了黃昏就驅車返酒店。旅行社美其名方便團友去探親，實質是英國紙水高，故很多飯餐及活動也不包，故早早就帶我們返酒店。今晚我們住的是CHELSEA球會旁的酒店，對正車奴士練習球場。幸好步行不需5分鐘就有一shopping mall及supermarket，所以對於我地不用探親的，就有救了。由於是晚晚餐需自己食自己，故我們就吃了這些....

從未試過喺旅行時打邊爐，好過癮呀！

其實喺英國買嘢低過喺意大利，起碼人地set個price都合理啦！