用錢買安心

因為擔心、緊張、怕死，所以要迫自己去看看醫生。$1220包心電圖、照X ray、抽血、驗血壓、consultant，兼且包埋讓自己安心，總算抵抵抵。另一個跟進，係時候再要迫自己keep吓fit喇！

說再見

隨著神父的祝福及帶領，眾人的眼淚與詩歌，就此向他說再見。
看見他躺在小小的棺木內，心裡覺得很痛、很痛；
聽著他的生平時，眼淚失控地流出來。
但我深信他必會得到神的眷顧，將他帶到一個充滿平安、充滿喜樂的地方。將他一直欠缺的，通通都交回他，包括一個完整的家、親人、健康、智慧、人生...。
因此，我會記著他那張可愛、純真的笑臉、那咬字不清的一段『媽媽好』、那討人喜愛的每一句說話、每一個動作..........
希望他以後的一切安好。

回家了

結束了 7 days 自由人生活，終於返回自己的家了。雖然今早被迫要早早執行裝，同埋要趕返屋企放低D嘢再返工，但仍然感到開心，因為又可以鑽入自己個被窩裡。唔知點解，今晚氣溫下降了不少，但仍覺得自己屋企溫暖許多，還是覺得自己家最好。

生活篇

好凍呀！唔知點解今年的香港特別凍，兼且仲要凍得特別耐。尤其是喺家姐屋企，D風吹埋黎就好似人地打風咁，凍到個心都震埋出來。還有兩天，家姐同姐夫就回來了，我的獨居生活又話咁快完結了。唔知係咪近日發生太多嘢，搞到我都無咩心機，所以無上一次過得咁開心。Anyway, it is better for me to leave alone and take a break.

Next week, I have to start my new lives ~ hope that problem would be overcame. May God bless me！

又一新菜式

近期想著弄很多的特色菜，包括之前的泰式冬蔭公、意大利磨菇飯，今天又想到整一味 ~ 就是炒韓國粉絲。原先想炒泰式粉，但看見有韓國粉絲賣，又心血來潮的去弄一下。味道嘛，我說不賴，你相信嗎﹖想看看製成品﹖稍後奉上。

作怪

沒想到會這樣的痛，真的感受到是一個signal了，係時候作一些行動吧！什麼也不想，只希望能夠好好的改善一下。若不，我想不能一直撐下去。

心情病又發作了！

昨天明明計劃好今朝做什麼，誰知昨晚早早就去睡的我，今朝一而再、再而三咁瞓返。原來計劃好今早起來去吃個早餐，之後準備一下今日個活動，之後休息一下才返工，點知只能夠求求其其地準備個活動，之後就什麼也沒有做到，真的不知道為什麼會這麼累。
返工途中，個心情病又發作了，同事以為我發生什麼事，我唯有回應佢係因為擔心下晝的program而已，誰知係因為我心情病又黎囉！

苦~

明明計劃好晒點樣過今日，但係仍然被昨天一個結困住，搞到我什麼也沒有做。有無可能1分88下呢﹖若果真的是88下，咁係咪個人都好唔掂吓﹖我想可能有D嘢出咗問題，我自己整都係1分70咋！唔好嚇我啦！

討厭呀！

喺神推鬼撞的情況之下，掉進一個攞黎衰的陷阱，真的令人覺得又煩又討厭。以往我必定會唔俾自己掉落這樣的陷阱內，但唔知點解我會選擇取捨這個。究竟可以怎樣解決這個惱人的問題呀﹖

此外今日一個好好的課題：當身體出現警號時應該怎做﹖

成長

好開心今日見到D細路個個都肥咗返黎。每次假期完結之後，都覺得他們又長大了不少。說真的，我們算是好彩了，因為D細路隨著年齡的增長，個個都定性了不少。雖然仍有一些令人困惱的事情，但是看見他們一天一天的長大，的確令人感到高興。

P.S. 從明天起，我又可以過我的『無皇管之獨居生活』了，因為家姐同姐夫會去韓國旅行一星期，所以借了佢嘅屋企『作反』幾日。好期待呀！

避『難』

今日無意中放假，剛巧媽子那邊的親戚做團拜。對於我這個『隱蔽中年』，當然係唔會出席呢D節慶活動~
但喺唔可以俾媽子知道我放假的情況之下，唯有扮返工，如常的出門口、如常的夜夜才回家。不過今天可以吃到好耐都無食過嘅Burger King & 打冷蠔餅，經已心滿意足了，所以是次避『難』的行徑也算值得的。

初十仍未有開工利是；真的大吉利是！

今日經已是初十了，當大家以為今年老細縮縮吓唔俾開工利是，點知今日返工聽聞有同事經已收到老細的開工利是了。唔知邊個身先士卒，叫老細俾利是呢﹖真係要多謝嗰位人兄。正如依扶所言，開工利是梗係要俾，意頸黎架嘛！而且近期又咁多唔開心嘢發生，梗係要旺一旺佢啦！不過，正如我回應說：『都經已習慣了，因為之前的老細都係唔會派開工利是架啦！』

唔知我嗰封幾時收到呢﹖

再戰意大利飯

難得今天放假，天氣又凍凍地不願出街，選擇留在家裡再一次挑戰整意大利飯，不過今次忘記影相，但係好味程度較上一次的為佳，秘訣就是微波爐了~hehe！

假期的工作

昨晚依舊不敢關掉房燈、依舊擔心被那急促的拍門聲叫醒，唯有將入睡時間調較至有咁早得咁早 {最接近起床的時間}，最終也能睡到一會兒。
今早該兩位同事仍舊請假，故此我繼續返工。幸好今早嗰幾個同事都ok，所以時間都好快過。不過明明三天的假期，現在只餘下明天而已。

忽然通宵

因兩個同事生病，其中一個本身要返通宵，所以今晚又要頂一晚通宵。其實當知道要返通宵的時候也有點戰戰兢兢，因為有點驚驚，以及擔心睡得不好，所以有點猶豫。最終也答應了返通宵。今晚臨瞓前收到的一個電話，又令我重溫事件的發展經過，眼淚又不知不覺地流下來。連電話的另一邊也覺有點不知所措。

心理作怪

自那件事發生後，昨晚是第一次返通宵，但睡得不好，一直都不敢關掉房間內的燈、常常隱約聽到好似有人拍門，擔心又再次有人叫醒我，告知有事發生、一閉上眼睛又想返當晚的事.....。幸好今天也未致於影響工作，只是一回家就大覺瞓。

滿城關注事件

擾攘了多時的明星不雅照片案，今日終於有當事人肯出黎講下嘢。雖然得個分零鐘的對白，但吸引到滿城人的關注。

她指事件對自己和身邊的人造成很大困擾和傷害。她承認以前是很天真和很傻，但她現已長大，她很感激公司、家人、朋友對她的眷顧和支持。她對今次這件淫照事件對於社會大眾造成影響感到抱歉，在未來的日子裏，她會繼續努力工作和積極面對人生。最後她多謝傳媒的關心，以及感謝一批對她不離不棄的歌迷。

天真和很傻 - 就可以做D咁嘅行為咩﹖咁即係咪意會被迫架﹖
現已長大 - 經過咁大單嘢，miss咗咁多搵錢的charges，梗係要長大啦！
對於社會大眾造成影響感到抱歉 - 抱歉都救唔返千千萬萬的網民的心態啦。
繼續努力工作和積極面對人生 - 梗係啦，堪輿學家話08年佢會有財運架喎，仲唔俾心機搵多D錢，真係想就咁從此消失於演藝界。
感謝一批對她不離不棄的歌迷 - 這班歌迷都算唔話得，到今時今日都肯企出黎撐佢，仲話只不過係當事人嘅私人生活，真的支持到底。

明天要開工啊！

八日假期話咁快就結束了。雖然相比之前嗰D假期去咗旅行，今次個假好似見使D，但係都係唔捨得咁快又要返工。當然比起其他人，我可以咁早就放假同放咁耐假係一件好事，但係一提到要返工就千萬個不願意，而且喺這個假期完全沒有做過公司嘢，真的唔知點算。希望新一年我的工作效率可以提升多D，而且事事順利吧！今年好似會有貴人扶持，而且又有望升職加薪，希望可以如願以償吧！

新年新菜式

新的一年，我祝大家『飯飯』都掂！一『團』和氣！情意『綿綿』！
我今日喺屋企整咗個意大利忌廉芝士磨菇飯，都幾OK架，只係稍為綿了一點。下次整的時候，唔好落咁多水份，應該可以好似人地咁將D米整到一粒粒，但同一時候又沒有生米的啊！加油！

對一個人的感覺

我唔鍾意見到佢，因為我覺得喺佢面前，我會生起忌諱。不知為何，可能覺得他不值得這樣好。雖然不是常常見到他，但知道他的出現，我就會沉下去。

第一次攝太歲 ~ 但係我今年無犯太歲喎

今日同家姐、姐夫、媽咪、姐夫個妹一齊去荃灣拜太歲 (正式黎講應該係幫細妹攝太歲，因為我今年無犯太歲)。今次係我第一次拜太歲，過程嗚sir sir咁，不過都幾得意。先點咗三支香同蠟燭，然後入廟拜中央個太歲 (要放三支香於檯面，因為入廟後唔可以生火，故只可以放低而已)，跟住去拜當年的太歲 (又要放三支香於檯面)，接著就拜自己所屬的太歲 (應該是細妹個太歲) (再放低三支香)，然後就順序每一個太歲拜一拜，以及各放一支香於檯面，最後化寶就完成了。

恭『鼠』發財！

大年初一，先恭喜大家新年快樂！身體健康！『鼠鼠』生威！一齊發大財！
今日的節目就是同媽子一齊慶祝生日，我地選擇了去唱卡拉OK，連老豆都去喎！正正正！
當中有幾個難gat：

1. 媽子說：『有無雨落呀﹖』我即時回應：『雪櫃咪有雨落 (乳酪) 囉！』
2. 『D豬手好有豬味』我回應：『係呀！雞好有雞味；豬好有豬味呀！』
3. 媽子叫我地：『年初二無咩做，就去攝灶空喇 (攝太歲)！』

年三十凍凍凍

話咁快又到年三十晚，今年什麼也沒有做，無行花市、無買新衫、無買新鞋 (雖然睇中了一對2百幾蚊嘅，但最後也沒有扑搥)、無planning去邊度玩、無諗過要做咩........無....無....無....無....無....。都唔知自己攞假來做咩！~
印象之中，好耐都未試過年三十晚咁凍了，得11度。上年仲好似著短袖衫去行年宵，今年就凍到隻手手腳腳無晒知覺。大家記得著返多D衫呀！

有點失望

是心情不好，還是天氣不好呢﹖
明明約好年初二一齊去迪士尼，唔知係因為心情唔好，抑或係天氣太凍而泡湯了﹖不過點都好，只希望這個假期可以過得簡簡單單、平平安安就心滿意足喇！

兩年前的一月廿九，係我開blog的日子。之前同自己講過，一月廿九號要記得這一天；但最終無聲無色咁過咗，仲要係今時今日才記返起開blog兩週年紀念日經已過了一星期，真失敗！
今年媽子咁啱喺年初一生日，係時候要好好準備當日的節目及禮物了，免得又無聲無色地過。

又剪了新髮型了

臨迎新年，係時候去整一整個頭。起初也沒有什麼心水，只希望不要剪得太短，同埋cover咗D『惱人髮』就經已OK，但一入到髮型舖見到好多人就經已無咩心機，好彩同我剪開嗰個stylist都知我心意，新年唔好搞咁多花款住，剪個簡簡單單碎濕濕頭，不過幫我洗頭條o靚妹就唔多掂，洗頭又大力，又喺我面前呻來呻去，又話好累、又同另一個洗頭嘅呻無得行花市。唉！妹妹仔，有得你搵就唔好嫌三嫌四。之前都未見過條o靚妹，應該是新來的，而家D妹妹仔呢......

銀行出現臨時塞提

今天去太古買嘢，諗住先到地鐵站內的提款機攞錢，竟然整個地鐵站5部提款機都無晒錢，而地面兩間主要的銀行提款機又大排長龍，莫非市道真的好得咁誇張﹖搞到出現塞提真的是有點嚇人。

希望 vs 夢境

『於一大片花海中，他對著我笑。』

我不記得這個畫面是我的夢...
還是我哭得太累，臨瞓前的一個景象...
抑或是我潛意識的一個希望...

是真是假也不重要，
起碼我覺得他去了一個開心的地方。
我想是力力希望我可以安心吧。

再見了！

平日唔多願執嘢嘅我，昨天突然去執拾舊背包內的東西，無意中發現他的一張照片。相中的他笑得很可愛、很無邪；但心裡仍是『那』住『那』住。
今早收到他離開的消息，整個人也沉下去。這12日彷彿過了很久很久，還記得他當時入院的一舉一動，心痛得很。那天送院的我，今天第一個收電話的又是我，一切彷彿與我有關連。而昨天的照片彷彿像是與我說再見。
天父，希望你能夠幫我們好好照顧力力，讓他於你的懷抱中繼續展示他可愛、無邪的笑容。