今日的事

繼兩日前同o靚妹傾計傾到夜之後，今晚又再繼續，只不過換轉是佢返通宵，我夜走而已，但我沒有她的厲害，頂到凌晨12點幾就嚷著要離開。佢同阿蕭的事好像好了點，所以大家就公司嘢在發嘮叨，唔知係咪心情唔好，所以我滿口的都是埋怨；又可能是我滿口都是埋怨時，搞到o靚妹都是，希望唔會影響到佢喺呢間公司的感覺。
今日都有d開心嘢，就係得知同事d供積金因為金融海嘯而損失好多，據聞有同事損失了7萬蚊，但我竟然係有5千幾蚊的利潤，真的要感謝了！

今日的事

尋日媽咪去左抽血，今日見醫生。
醫生表示媽咪的血色素偏低了一點，所以未可以打第二針化療及食藥。其實我都唔係幾明白，不過下星期媽咪會再抽血及見醫生，屆時我放假可以陪媽咪一齊去，希望可以知多少少啦！

今日的事

今日媽咪去抽血，我又要返通宵囉！
本來今日好累好累，打算早早上床休息，但點知o靚妹留低左同我傾左好耐，不過係傾佢同阿蕭嘅嘢，傾到凌晨三點幾佢才離開公司，真的有點佩服自己。
同o靚妹傾計時，見佢眼角有淚光，這個小女孩真的承受了許多許多。年紀少少的她要撐到今天的狀況的確不容易，更難得的是她讓人感覺到她真的長大了，換轉是我的話，結果將會是兩個極端，希望她的事可以雨過天晴。

今日的事

今日如常開工，o靚妹見我戴口罩，問我係咪唔舒服，我只係簡單的回應『唔係』就算。自媽咪有病之後，我喺公司必定會戴口罩，畢竟公司太多病菌，d小朋友又唔多識保護自己，唯有我小心d。除此之外，我的生活習慣都有少少改左，以前放工回家第一件事必定會係攤喺張梳化度休息一下，到臨瞓才會沖涼；但而家，一返到屋企，就第一時間將著緊d衫，洗得就洗、唔洗得的就放喺當風的地方吹下，之後就即刻沖涼，希望唔好將公司的病菌帶返屋企啦！
媽咪明天就要到醫院抽血，看看食緊嘅藥是否ok，後日再見醫生，希望個result is good la！

今日的事

今日同媽咪、爸爸去了赤柱半天遊。

印象中，好像很久沒有去過赤柱了，只依稀記得上一次好像同大專同學去BBQ，應該有好幾年了。赤柱好多舖頭也close the door，不過仍然依舊是一個感染旅遊區的一個好去處。

今日喺赤柱影左d相，相片中的媽媽，比起上一次農曆新年時去林村影的相中，瘦了許多許多，應該有十多、二十磅，望見今天媽咪的單人照，真的很心痛！唯有讓媽咪看那些三人之自拍照 (因為是斜影過去，故比起來大家塊面會肥d，當然我的更不堪設想，但只要媽咪影得令經已好足夠了)。

回程時，將近到屋村的路口時，媽咪下意識地戴回帽子，心想這樣可能令她個心會舒服一點吧！自化療之後，媽咪今日係第一日出街，希望可以令她鬆一鬆之餘，今晚可以好瞓一點吧！

今日的事

今日媽咪都算ok精神，不過為了鼓勵她，臨出門口返工前，同媽咪講：『聽日我放假，今晚瞓得好d，聽日一齊去外走走。』媽咪報以一個笑臉。
其實有時都幾恨自己的工作時間，別人放假的日子我不放假、收工的時間又是別人睡覺的時間，不過慶幸的是，而家個post放星期日的日子比以前的為多，算lucky吧！

放工之後，同阿扶傾左個幾鐘電話，自從轉左手之後，好似好耐無同佢傾電話，雖然內容有點無聊 (無聊到大家竟然喺度研究星座)，但起碼同佢傾計時自己覺得有返d滿足感，經已好滿足了。

今日的事

今日爸爸去了一天遊，照顧媽咪的重任就交左俾細妹，因為今日我要返工。老豆都應該relax吓、放鬆吓、抖吓，因為要照顧媽咪都需要精神，所以老豆真的好厲害！
今日難得媽咪有興趣食魚旦河，細妹買左一碗返黎俾佢食。以前我都好鍾意買唔同嘅嘢食俾媽咪同老豆試；但媽咪有病之後，即使好想買嘢俾佢食、俾佢試、或者逗佢開心吓，但又唔知買咩好，好似樣樣都唔啱佢食，好慘啊 (我指媽咪，因為好多嘢都唔食得，又或者無胃口去食)！
今晚放工回來，媽咪醒左 (應該話佢瞓唔著)，佢話今日成日都好精神、瞓唔到，唔知有咩方法可以令佢瞓得好d呢﹖之前買給她的香薰機，佢好似打左化療針之後聞覺得臭、好似頂唔順，所以無再用，唯有叫佢飲杯奶，並且叫佢聽日出外走走，或者會好一點 (雖然這幾天屋企附近無咩太陽，但其實過左北角之後就好d，所以勸佢聽日出外走走吧，因為這幾天打左化療針都唔可以出街同洗凍水，所以都屈左成個星期喇！到外面走走也是一件好事來！)希望明天她的睡眠質素好點吧！

今日的事

今天媽咪的精神好似幾好，我問她係咪覺得精神d，她也表示係。
我好開心見到媽咪精神d，因為咁樣都會令我開懷一點。雖然病仍舊是病，但只要她好一點，相信都會令我們感覺好一點，所以大家都要加油呀！
今日伯父黎左，今日同伯父吹水吹得好開心，講左好多佢行家嘅事，包括上次跑馬拉松當日，有個賊喺紅隧打劫個的士司機、另一個的士司機被打到豬頭嗰單嘢等等，感覺好似好耐無咁樣吹水法，不過望真d，其實伯父也老了許多。

媽咪貓仔齊加油呀！

差不多近一個月沒有寫blog，係唔想將心入面唔開心嘅嘢重想一次、或者回憶一次再寫出來，因為我知道每想一次必定會哭一次，或者到今時今日我仍未接受這個事實，即使見媽咪日漸消瘦、同埋而家已開始緊食藥同打針化療，我都仍然解唔開呢個結，因為每次憶想起當醫生第一次同我地講呢個消息時，媽咪含住一眶眼淚的無奈眼神、或者諗起媽咪話最擔心嗰個係我的情景、或者想到媽咪同我講叫我以後要開開心心，繼續維持一年去四次旅行等等.......，我的眼淚就會失控的流過不停，所以到而家我都唔太敢直望媽咪對眼，因為....其實我....好內疚....因為媽咪到而家咁辛苦都仍然擔心我，好想同佢講：『對唔住！』
不過，我希望我可以為媽咪的健康而努力之餘，我亦希望自己可以為堅強而努力，正如細妹講，要哭、要不開心都不要在媽咪面前表露，我會學會躲起來哭。
媽咪，加油呀！貓仔，加油呀！Arjar arjar！