媽咪貓仔齊加油呀！

差不多近一個月沒有寫blog，係唔想將心入面唔開心嘅嘢重想一次、或者回憶一次再寫出來，因為我知道每想一次必定會哭一次，或者到今時今日我仍未接受這個事實，即使見媽咪日漸消瘦、同埋而家已開始緊食藥同打針化療，我都仍然解唔開呢個結，因為每次憶想起當醫生第一次同我地講呢個消息時，媽咪含住一眶眼淚的無奈眼神、或者諗起媽咪話最擔心嗰個係我的情景、或者想到媽咪同我講叫我以後要開開心心，繼續維持一年去四次旅行等等.......，我的眼淚就會失控的流過不停，所以到而家我都唔太敢直望媽咪對眼，因為....其實我....好內疚....因為媽咪到而家咁辛苦都仍然擔心我，好想同佢講：『對唔住！』
不過，我希望我可以為媽咪的健康而努力之餘，我亦希望自己可以為堅強而努力，正如細妹講，要哭、要不開心都不要在媽咪面前表露，我會學會躲起來哭。
媽咪，加油呀！貓仔，加油呀！Arjar arjar！