是日誌30.3.09

Am I a peaceful maker?
同一個同事傾談之間，發覺我給人的印象是一個『peaceful maker』。是嗎﹖或者是因為無心戀戰了，只知道事情越簡單越好，即使有多激昂會影響局面嗎﹖可能心態有點灰，但事實歸事實，即使你多努力、多執著，有許多事情是永遠也改變不了，與其是這樣，何不令自己簡單一點、平淡一點嗎﹖

是日誌27.3.09

原本打算放假同媽咪去南Y島一遊，點知雨下過不停，唯有取消離島之行，改去飲下午茶，之後行街街。前幾天打算今晚出街食飯，一來落雨、二來有LAUGHING哥座陣，點可以錯過呢！

近日Laughing哥真的人氣昇昇昇，原來死左都詢眾要求而返生，真的無咩幾多角色有這樣的威力。雖然今晚講明只出鏡一分鐘，但足已令大家期待不已，莫非香港人真的咁鍾意呢d邊緣人的戲，計之前 "無間道1、2、3"，到而家的Laughing哥，可見香港人的心態...幾咁...

是日誌26.3.09

今日收到一份計劃書，令我感到很後悔。
後悔的是我之前竟然浪費個幾鐘頭同個同事講點樣寫計劃書，點知佢今日俾我那份同佢第一個version無分別，咁我做咩浪費嗰d時間俾d咁嘅人....白痴囉！
其實除左呢位同事之外，另外的也不礙如是，係因為我的問題，還是佢地嘅問題呢﹖

今日媽咪去左抽血，看看第二次化療的情況係點樣，hope everything goes smooth！

是日誌22.3.09

今日好特別，好少有機會讓我靜靜認識香港仔。
事源今日約左媽咪、老豆去搭下珍寶船，因為佢地唔知道原來搭珍寶船由黃竹坑去香港仔是免費的，所以放左工之後就約左佢地喺黃竹坑等，之後帶佢地搭。我就好像充當一個小小的嚮導，向他們介紹這、介紹那。其實不消10分鐘的船程，但我地就真的好像遊客般『東張西望』。
喺香港仔落左船之後，我地竟然坐在香港仔海濱公園內傾計，差不多一小時才離開。雖然傾的內容都是我公司D好笑嘢 (可能都係嘮氣嘢，不過再說一遍之後就變成笑話了，但感覺十分好，好像好久也沒有與他們傾得那麼暢懷了。即使昨天晚上只睡得兩、三小時，但只有上了巴士才感覺到眼困的感覺，感謝！

是日誌21.3.09

今晚屋企得返老豆同媽咪，因為我要返通宵，而細妹就跟collen返鄉下拜山，唔知佢地o唔ok呢﹖又或者無我地喺度，佢地可以靜靜地傾下計、早d瞓.....。不過我就有d擔心，因為佢地呢排有d嘮叨，可能大家心情不是太好，老豆又過份緊張，所以很容易就會嘈起上黎，只不過為的是點樣煮那樣餸、又或者食邊樣嘢先等等無聊話題，不過佢地在緊張、憂慮的心情濃罩下，有這樣的表現也是正常的，只希望他們可以輕鬆一點、開心一點吧！

是日誌20.3.09

今天我差點兒搞到屋企火燭，好彩老豆出左街，如果唔係佢實哦死我。
事源諗住用微波爐叮一包嘢黎食，包裝袋寫住要叮12-14分鐘，我都覺得奇怪，所以續兩分鐘咁樣叮，點知到了第三個兩分鐘之出事.....，微波爐開始冒煙、出臭 (燶) 味，此時就知道大鑊了，即刻去關掉所有電掣，但氣味是補救不了，充斥住整間屋同走廊，搞到隔壁D八婆又多一個話題喺度嘈。唉！真失敗！好彩無事，如果唔係就大件事了.....

媽咪今朝出左街晨運，但可能她真係體虛，所以回來後即刻上床瞓，我諗佢真係好累！希望佢可以休息多D，等個身體可以復原得好D！

是日誌19.3.09

原本今日約左家姐食lunch，但臨換衫出去之際家姐打電話來，話唔記得左今日要上堂，所以同我唔到一齊食lunch，所以最終也沒有出街。
至於媽咪，今日好似好累，always瞓覺，不過就唔多瞓得著。當老豆煎魚時，佢聞到後就覺得好反胃，都替佢辛苦。
今晚家姐攞左個假髮返黎，喺大陸買的，都ok架，不過我諗夏天戴都幾焗。

是日誌18.3.09

今日媽咪塊面都有紅，不過明顯地無尋日紅得咁厲害，媽咪今日出左街，去健康院度一度血壓，看看有沒有事，只係血壓低了少許。我見媽咪面咁紅就擔心、陣腳開始亂，都係細妹定當d，真的甘拜下風。

最近公司又為左改『文章』而勞氣，我同阿珠都被班人激死左，不過最令我唔開心的是，某某竟然為左唔想挫一個同事的銳氣，就特登copy左嗰個同事的『文章』，費事被嗰個同事見到佢改到份嘢花曬。哼！衰人佢唔想做唔緊要，但我無諗過一個平時都算係公正嘅人會咁厚此薄彼。
除此之外，今日收到個消息，就係『賣得吓錢』那位同事會過檔姊妹學校度。唉！呢度都fulfill唔到，更何況人地嗰邊，唯有祝福佢啦！

是日誌17.3.09

今日問媽咪打左針有什麼不舒服，媽咪話尋晚瞓覺時將隻手放高，所以今次無上一次咁痺，之不過今次的胃口沒有上一次的那麼好，好多時都覺得想反胃、同d食物無味。
今早見媽咪的面紅紅，以為她不舒服，但探熱又無發燒，唔知咩事呢﹖

是日誌16.3.09

今天媽咪到醫院打第二針，雖然今次的藥份少d，但媽咪話一打落去就即刻感覺到痺，可能她的身體虛弱左好多。今日家姐同細妹都有返屋企食飯 (我就要返工)，可能佢地稍為晏才返到屋企，老豆就因此而發老脾。不過自從媽咪有事之後，老豆都好辛苦，佢咩都攬黎做，所以佢都瘦左好多，希望佢都保重自己的身體啊！

今日的事15.3.09

明天媽咪就要打第二針的化療針，即係代表佢有一星期不可以出街了，所以這個陽光燦爛的星期天，我同媽咪、爸爸一齊去左遊車河兼遊大澳。點解係遊車河﹖因為搭了許多轉車，先搭巴士落銅鑼灣、再轉E11、喺東涌再轉新大嶼山巴士11號到大澳，轉來轉去，就由點幾轉到3點幾、4點才入到大澳。

好像好耐也沒有入過大澳，呢度果然變左好多。

周圍都有好多賣鹹魚、蝦乾的地方...

我地食左『雞屎滕』茶果，不過唔記得影相，

之後食左芝麻砵仔糕

除了好夕鹹魚、蝦乾之外，近年興曬柑桔

附近的景色都好令架！

有仙人掌開花、小白鷺、白雪公主同七個小矮人，當然唔少得我地啦！

今日的事

天氣突然又轉冷，真的很難想像回春的日子還有14、5度，而且今朝仲要返早，晨早5點幾就要出門口，不過沒有想像中那麼冷。
回家後諗住瞓一瞓，點知剛瞓著左，個手提電話在枕頭旁邊震，原來係媽咪喺屋企打電話俾我。咦﹖我咪喺屋企瞓緊覺囉！媽咪本來係想打電話俾細妹叫她買嘢回來，點知打左俾我，哈哈，如果我接左會點呢﹖

今日的事

今日同媽咪一齊去見醫生。

今日見的不同上一次，今次嗰個係男醫生，係顧問醫生，態度好過上一次個女醫生。

醫生俾左個好消息我地，就係今個星期媽咪D白血球升返喇！真的感恩！上星期0.3，今個星期升到2.2，而且體重亦比上星期的重左，不過醫生就話下一次的針藥會減輕一D (因為上一次化療後，搞到白血球下降好多~但上一次個女醫生又話唔係差好多嘅！﹖此外醫生指佢的復原的時間較長喎，所以唔落咁重藥)。其實都唔知應該開心定唔開心，雖然白血球升左，可以打第二針，但係另一方面代表媽咪又要辛苦了，起碼一個星期唔出得街、唔掂得凍水等等，不過有得打都好過無得打，仲要個個星期黎抽血喇！所以媽咪，你要努力呀，我地個個都支持你架！

去完睇醫生之後，我地一齊去左花展。媽咪見到D花，成個人都開心曬！雖然我知道佢有點累，但睇完又開心D都值得嘅。今日同媽咪影D相，比起上一次去赤柱影的，媽咪肥返D喇，所以我返屋企第一件事就係print左兩張相俾佢開心下，都幾靚架。媽咪，你努力D，食返多D嘢，咁就會健康D、精神D！

今日的事

無無聊聊開個會，浪費時間及人力，都唔知為咩，好彩取消左提早返黎開，如果唔係仲浪費。
今日得我一個人沖涼，好彩姐姐知道得我一個人，仲入黎幫我手添。雖然最終一個人也沖得哂，但有同事關心下都開心d，hehe，可能感覺到自己都唔衰得哂，或者係平時積返黎的『功德』，姐姐才會幫我，如果唔係，被人玩都似！
明天媽咪就去見醫生了，我都有d擔心，不過點都好，我都希望佢可以開心d！

今日同媽咪講話喺公司AGENT訂的那盒營養奶粉返來了，屈臣氏賣$550，我就訛稱自己用$380訂回來，媽咪同老豆即時覺得好抵，佢地覺得好開心。雖然我係用 $510買回來，但我知道用5百多元買佢地一定話唔食、唔要，所以唯有出此下策。不過有個好好笑的笑話應運而生，就是佢地知道我用咁平嘅價錢買那盒營養奶，出奇地反應好快咁問我：『咁飲開嗰隻加營素喺我嗰度買咪又會好平囉！』哈哈！當時我有D唔係點識反應佢地，不過anyway，佢地開心就好了，咁我就幫佢地『訂』那隻奶粉之餘，亦『訂』埋加營素啦！haha！

今日的事

今朝原本瞓到10點幾，點知未起身六舅婆黎左探媽咪，唯有扮瞓覺躲在房入面，最後12點、1點鐘就出左房，佢地都未走，所以就自告奮勇地話去搵位飲茶，hehe，實情係唔想喺度。好彩等左一陣就有位飲茶，飲到成3點幾、4點，之後返屋企繼續幫媽咪挑頭髮。臨上樓之際，媽咪話去睇睇飛髮舖叫人幫佢剃光佢，不過都勸媽咪唔好住。
4點幾開始挑，最終晚上10點鐘就完成整個挑頭髮的工序，成個人腰骨、膊頭都好痛，不過都唔夠媽咪咁辛苦。再望返佢，起碼掉了2/3的頭髮，希望我會慢慢接受這樣的狀況吧！;(
聽日媽咪又要抽血了，大家也希望她的白血球可以升返，之後可以打第二針，大家努力吧！

今日的事

今日開緊工的時候，細妹打電話俾我，話媽咪尋日洗頭的時候，可能因為太多碎髮，所以當她一抓的時候，就堆成一團，而家變成一個『春麗』妝，有兩個髻在頭上。
返到屋企之後，見到媽咪，頭頂上好像掉了好多頭髮，只見露出好多白色頭皮的部分，頭頂就有兩個髻，死死實實的。我問媽咪有無唔開心，佢話無，但當我逐d逐d幫佢挑返d頭髮出黎時，見到一執執頭髮在我手上拉下來的時候，好心痛！好彩媽咪背住我、睇住電視被我挑頭髮，有幾下媽咪笑緊電視播緊的內容時，我的魂魄才返返黎。
今晚整到成12點都只係鬆左少少，所以聽日要繼續努力。今日個膊頭好痛。

今天的事

今日同媽咪去見醫生，唔知係咪好緊張，所以尋晚唔係幾瞓到覺，所以換轉係媽咪的話，更加多個晚上都瞓唔到覺。
今日醫生講媽咪d血內的白血球的數字係0.3，所以仲未打得第二針，正常1.8才打得，咁咪差好多﹖但醫生又話差少少喎，而且此情況好平常喎，都唔知d數字係咪double / triple計﹖醫生就話想白血球數字想上昇就要有均衡飲食，咩都食得，連牛扒都食得，搞到媽咪出醫院時講笑咁講話要去鋸扒添！下星期要再驗血，再看看情況如何！
醫生介紹左一隻營養飲品，去屈臣氏睇，嘩！$550大元，15包。雖然我都覺得有d貴，但我都諗住買，不過今日同媽咪、老豆一齊當然唔會買，咪吹水同佢地講等我問問公司嗰間藥物agent，看看有沒有平 (當然無咁嘅事啦！)，只希望媽咪可以多一個選擇啫！

今日的事

今日媽咪去左抽血，聽日我就會同佢去見醫生，看看是否可以打第二針。
今日返工又出現左擦鞋大會，因為老頂黎左，計計下佢應該有差不多兩年來無黎過。今次來係因為黎緊要做評估，所以佢先緊張下大家會搞垮。至於今日的擦鞋大會真的聲色俱厲，真的令人『敬佩』！明明唔鍾意都懶係要take care個女，老頂一走左就即時唔想要個女，果然係擦鞋王！

今天的事

今天媽媽從地上慢慢的用膠紙貼起她掉下來的頭髮，我想她的心裡必定很擔心，特別是看見她在日曆的3月3日上寫著 "脫髮"，以及她所穿的衣服的背部留有許多掉下來的頭髮時，眼淚又開始想湧出來。其實媽咪早在2月2日做手術的前一天洗頭、洗澡後，我已發現浴室內餘下許多掉髮，但心裡當然否定現在的結果，不過事實歸事實、頭髮真的掉下來，只好默默的接受吧！
近日媽媽的胃口似乎不錯，希望她明天的驗血順利吧！

今天的事

今日媽咪問左我一個問題，令我覺得佢仲未接受自己係cancer。
她聽游水的fd講，佢又係幾個月內食唔到嘢、瘦了許多，之後去了銅鑼灣一個西醫睇，診斷她為胃酸倒流，食左d藥好返好多，之後媽咪就話想攞X光片去看這個醫生，問下需唔需要繼續做化療喎。又或者上次醫生話佢血色素唔夠嗰陣時打唔到第二針，佢以為代表以後唔可以再打、又或者而家停左的話，咁第一針的藥力將會失效等等。
其實當時我又好驚見到佢d無奈的眼神，不過同自己講要勇敢d，所以都有同媽咪解釋返d化療針可能好勁，唔可以連續地打，會好傷。就好似我地平日傷風感冒食左d藥個人都會散啦，有時我地食一劑唔ok都要再見醫生食第二劑啦，所以呢段時間係俾佢休息下、養好身體再打第二針等等 (我自己估估下咋)。講的時候我都覺得自己有點口吃，強忍住d淚水，到覺得d淚水開始從眼角想流出來的時候，就盡量講完我想講嘅嘢，就離開媽咪間房(唔知媽咪feel 唔 feel到呢﹖)。
我唔知呢番說話對媽咪來說有沒有效 / 俾唔俾到信心佢，但對我而言就係學習緊點樣面對媽咪那些無奈的眼神、表情、說話，以致學習怎樣控制我的情緒吧！