是日誌24.5.09

為了paddington bear有點傻，一家竟然星期天往惠康買東西，為的是買滿$300儲雙陪印花。其實都唔知有無可能儲到咁多個，但都叫做有個希望、有個目標俾自己喇！其實自從媽咪驗出胃癌之後，覺得自己好多時都六神無主、無目標、沒有什麼勁兒，甚至於連不久發生的事也沒有印象，就好像媽咪問我端午節去返上一次母親節食嗰間餐廳食好唔好，我死也記不起母親節去了邊間餐廳食晚飯。真的是傻了﹖還是其他﹖

是日誌15.5.09

今日得知一個突然離職的舊同事最新的動向，感覺有點難過。
早前聽聞嗰個舊同事被人禁錮左喺大陸，有傳係因為錢、有傳係因為女人....，但一直也沒有他的確實的消息。前幾日有個同事在街上踫到嗰位離職的同事，原來佢被人打斷左手筋，所以再不能工作。以前我都曾經同呢位同事有點過折，但聽到呢個消息之後都有點愕然及難過。呢個同事曾經係傑出義工、戒賭過來人、基督徒、準社工...，如今有這樣的結果是他預料的嗎﹖不過一想到他衣櫃內那些『恐怖』的東西時，唯有輕嘆一聲......

是日誌13.5.09

得知媽咪有進展，大家也感到很開心，不過仍然要為打後的日子繼續努力。
講到最開心的應該係媽咪，因為媽咪今日又開始睇返財經台。以前媽咪未有事之前，由朝會睇財經台到晚；但自有病之後都好少見佢開黎睇。尋日醫生話有改善之後，今日媽咪又開了財經台，手執紙筆來『做功課』。我笑媽咪又努力做功課，佢就答我『無咩事要搵返d駛用』。嘻嘻，但願媽咪有個精神寄託，唔好好似以前咁博老命同看得太重就可以了。

是日誌12.5.09

尋日同媽咪去左見醫生，呢次見醫生嘅意義好重大，因為係媽咪患病之後再照ETC電腦掃瞄，看看化療的情況如何。臨出發的前一天我個心都囉囉孌孌，我相信媽咪都係，因為佢都擔心個結果。當然我都係死撐咁同媽咪講：『唔好諗咁多！』
看完醫生之後，我真的很感恩，因為醫生同我地講，經過左3次的化療之後，媽咪身體內的癌細胞擴散的程度縮細左，而個腫瘤都有細左，而且今日仲可以打第四針，兼且化療同見醫生的日子同細妹book嘅氣功班的日期perfect match，真的很開心，不過我仍是那麼無用，因為咁樣我d眼淚都有湧在眼眶內，不過係因為開心而想哭，希望媽咪一天一天的努力、一天一天的有改善。

是日誌7.5.09

差不多一個月沒有寫日誌了，甚至乎連電腦也不想開，生活真的令人生厭。
豬流感令大家人心煌煌、接二連三的case爆鑊令我抖不過氣來、兩個甚喜歡傾計的新同事令人忟憎到極點......，一切一切都好像不順，又應驗了那句說話：『一黎就一齊黎！』
而家好想令自己的生活簡單一點，盡量不去想/做太複雜嘅嘢，煩少d、簡單d、虛度d.....