會傷人的說話

今日聽到老豆同姨婆講電話，說阿姨、舅父、姨媽的什麼不好、什麼『有事就識搵人，無事就唔見人』等說話，又說以前媽咪什麼什麼.......一大堆三姑六婆的說話，邊聽我的眼淚就一直的流過不停。掛斷了電話之後，老豆仲想同我講阿姨、舅父的不是，我即刻叫佢收聲，因為我完全唔想聽。
當然我知道阿姨、舅父、姨媽有時真的有不對的地方，但點解仲要摷翻出黎講﹖媽咪都唔喺度，點解仲要一件一件事咁講番出黎﹖我知老豆不嬲對舅父、阿姨佢地都有意見，係因為佢地成日同媽咪借錢，同埋好多年前姨丈幫我地屋企裝修而老豆對他好大怨言，所以佢一向對他們都有偏見。而家媽咪過左身，我唔奢望老豆同佢地的關係可以有任何的改善，但我只係覺得你唔鍾意嘅，都唔好將問題賴落媽咪度，話係媽咪埋怨的。講真，佢地係親兄弟姐妹，有事唔通唔幫手咩﹖媽咪有事，細姨喺屯門都即日過東區醫院探媽咪啦！每個人都有自己的生活、難題，輪都唔輪到你去評論邊個應該點生活、邊個應該離不離婚、邊個應該節唔節儉........。我只可以說，老豆你唔接受他們係『親戚』，都唔好喺度說人壞話。何況，姨婆都是他們那邊的親戚，都經已好清楚他們的底細，仲需唔需要你喺度加鹽加醋﹖

幸好媽咪聽不到他的說話，若不是，真的很心痛。