迎接新居所

請了幾天的假期又完結了，總算叫做差不多執好了大件的東西，只有一些濕濕碎碎的東西而已，應該可以喺下一個假期完成。

而家的工作進度表就應該只有以下這些吧：

1. 收屋
2. 清潔 (7/10.....)
3. 最後收拾
4. 搬屋
5. 將物品安放好合適的位置
6. 清拆、還回舊居
7. 安安樂樂住在新屋

希望一切順順利利吧！

最搵笨的燒腩仔

中秋節翌日假期那天去飲茶，叫了一份燒腩仔。從來也未吃過那麼搵笨的一碟燒腩仔，價錢與平常的差無幾，但就變成了這樣子......

後悔叫了它！不得不上載給大家看看！

打邊爐

曾是我的至愛活動~打邊爐，已有好一陣子沒有做過了。以往無論什麼天氣、什麼季節、即使一個人也好，我也會打邊爐的。不知在哪時開始，忽然間『打邊爐』這三個字從我的腦海中消失得無影無踪，對上一次打邊爐好像是靠家姐車邊同阿成一家打邊爐而已。

家姐昨天忽然慶起，說要打邊爐，大家就決定今天打邊爐。雖然仍是不知道有什麼新東西吃、仍是依舊買那些食物，但好開心可以做一樣久違了的活動，希望以後在新屋可以多點打邊爐，畢竟是我的最愛的活動。

妳離開的第300天

媽咪：

今日係妳的300天，我地選擇左一齊喺家姐屋企食飯兼做 (中秋)節。雖然大家也不知道是妳的300天，但在我心目中，妳也同我地一齊做節的。中秋節本應就是一家團圓的日子嘛，所以緊係預埋妳啦！
隨著日子一天一天的流逝，100天、200天、300天的過去，差不多妳離開了我們快近一年了，每次有人提起妳，或是看見妳的相片，我的心都不禁酸一酸，也記掛住妳去年的今天在做什麼、今年的今天又在做什麼....。原來一年了，這一年好像沒有過過似的，做過什麼﹖好像也不能具體的說出來。

我知我許多時候做得不夠好，仍有許多地方需要改善，但有些東西我仍舊是改變不了，就像是我的心仍是這樣，我仍是妳那個傻傻的女兒，我與妳的一切仍然深刻的在我的腦海裡，但願妳也是一樣。

下個月我們就要搬了，妳也要和我們一同搬到新居，繼續同我地一起，知道嗎﹖

永遠愛妳的女兒

中秋快樂嗎﹖

今天係中秋節，又係我假期的第一天，但似乎都不能提起我任何的興趣，因為仍在生病中。雖然吃了大堆頭的藥有點好轉，但個人勁散，好累，成日都覺得好想瞓，所以今日應該係渾渾噩噩地過。

今年的中秋節什麼也沒有準備，以往也會買月餅湊熱鬧，但今年沒有，是氣氛﹖還是心情的改變﹖中秋節本應怎樣過，我就想怎樣過...........但願大家都中秋節快樂吧！

真的生病了！

一直也忍住，但最終也敵不過公司內的惡菌，生病了！
未入伙就要去新居附近幫襯看醫生。從未試過一次過吃那麼多藥，6種藥丸加一支藥水，可怕！不過最可怕的是，聲音沙啞、變聲、走音、失聲.....，好討厭呀！希望快d好返啦！因為22/9開始可以放幾天假，唔想被病魔纏擾我的假期！

又是一個失眠的晚上

凌晨4點30分，一個失眠的晚上，怎樣也睡不著。本應昨晚工作已很累，但仍是睡不著，又沒有什麼令我興奮的事，何解睡不著﹖有什麼好擔心﹖有什麼好煩惱﹖有什麼好想﹖連我自己也不知道。但願一陣關了電腦之後，可以入睡吧！

良心企業

前一陣子忘記了cut媽咪的付屬咭，點知早幾個月銀行收了我的信用咭年費。到近日有時間才去銀行辦理cut咭手續，一心諗住就算佢要我俾埋這一年的年費都算吧。到了今天收到月結單，原來銀行退返張咭的年費俾我，真的估佢唔到。
今時今日的服務態度，真的值得一推，因為有好多企業都會乘機食埋你那一年的錢，HSBC真的是良心企業，抵我無用佢銀行服務都繼續用佢嘅咭服務。

妳離開的第290天

媽咪：

妳離開以後，很久沒有人同我分享公司的不開心了。越來越發覺自己喺公司是一個人，一個人工作、一個人煩惱、一個人忟憎、一個人食飯、一個人悶悶不樂、一個人戰鬥、一個人解決事情....原來一個人的日子是這樣過的。
人與人的相處的確好奇妙，有時好想與人的關係好好，有時又會覺得人好煩，有時又會諗人的衰嘢，總之又愛又恨。
媽咪，其實妳而家那邊會有人嗎﹖抑或是一個人呢﹖很多時候我都在想妳那邊會係點呢﹖究竟人死後會係點﹖好地地一個人，好難想像一個人喺呢個世界上消失左之後的去向﹖會好像佛家所言會有輪迴、抑或係有重生、又或者係無左就無左呢﹖這好像係永遠解不開的問題。不過無論是什麼，我只希望妳在世界的另一端會開心快樂。
而家我地大家都為了新居努力，希望會有新的生活 (或者係我一廂情願吧！) 但願所有嘢都順順利利。

永遠愛妳的女兒

膽小鬼

忽然覺得自己變得更加膽小。
今晚放工時，連續不斷的行雷閃電、下大雨，d雷聲好像喺你面前劈開條路咁，恐怖程度比起睇恐怖片還要驚。唔知係自己膽小左，還是什麼原因，忽然好驚行雷閃電，特別係架車行經東廊時，好想快D駛過，期間仲見到一條閃光在維港上空閃過，真係好得人驚。

D人成日話香港地D高樓大廈咁高，故行人或行車於行雷閃電時都唔駛怕，會被大廈D被雷針擋嗮，而且D行人同行車move緊，故也沒有問題的。不過今天我搭車行經東廊時，我喺度諗成條東廊只有一邊有大廈，另一邊就是維港，仲係水黎添，咁若果行雷閃電會唔會劈中維港或者係東廊嘅車 / 路呢﹖雖然好似從未試過，但嗰一刻身處東廊真係咁諗架！希望聽日唔好咁大雷聲喇！唔係我放工嘅時候會好驚架！

是太忙還是不忙﹖

一日本應係8小時工作，但轉眼間又過左。當放工的時候，回顧吓今日上班時所發生嘅事，好似諗極都諗唔到，係因為太忙定係根本唔知自己做過d咩呢﹖講真，呢份工唔係最好嘅，但係又唔係最差的，問返自己過往咁多年喺公司得到d咩，我都唔可以好確實答到個答案出黎，淨係覺得好多人同埋事都有好大嘅轉變。

其實工作對我黎講係d咩呢﹖
咁對其他人黎講又係咩呢﹖

好似係一條好深嘅問題.....
要好好咁思考一下............

近況

應該不足一個月就要搬屋了，什麼也未準備好，到時會否好混亂呢﹖
希望一切順利吧！

近日身邊有不少人都話去旅行，先係Jolaylay (台灣同峇里)，跟住仲有兩個friend，唉！真係好羨慕呀！至於我，莫講旅行，而家買野都要小心一點，因為睇住銀行簿仔裡的錢越來越少，仲有一份三皮野嘅保險未交，好後悔舊年再做埋呢份保險，而家點算呢﹖之前plan嘅安排已失了預算，而家唯有自己慳一點吧！

delicious food

差不多過了一個月才與Jolaylay一齊吃晚飯慶祝生日，約來約去，最終不負眾望，大家去左食semi-buffet加stone grill。過程真的好搞笑，先係大家埋怨點解上主菜，d waiter收嗮我地d刀刀叉叉，唔通唔被我地再頭盆；原來食完個主菜，真的再沒有空間食其他嘢，真係大鄉里！不過，個main course果然真係好好味，又抵食，可以再追加，下次再去過。

睇吓幾大隻蝦同幾大塊牛柳，諗起都yummy！

妳離開的第280天

媽咪：

今日又要妳提我了，因為英姨打電話來問候我地。許多時間我十分欣賞妳與朋友的關係，特別是妳生病的時候，妳的朋友不斷的慰問、關心，到妳真的離開我地時，妳的朋友仍存在，直的今天他們也關心著我們。真的多得妳以往幹的一切，是妳帶給我們的福。

反觀自己，原來我真的不懂與人相處。朋友一個一個的離開我，或者係我衰吧！數數手指，朋友真的沒有多少個，好慚愧！有時在想，若果有一天我要結婚、生病、以至離開這個世界，或是有什麼特別的日子，會有多少人來看我呢﹖真的不敢想像！曾經做了一個小小的檢視，能做我的朋友的通常都過不了7年，是否真的7年癢一癢呢﹖又關唔關做朋友事呢﹖我也不知道！其實我也需要朋友，但更需要個人空間，但好多時我遇的都是迫得我緊的朋友，大大剝削了我個人的空間，或者是因為我不願意與他們交心，因而令他們一個又一個離開我嗎﹖失敗！

媽咪，黎緊我地就要搬離開一直陪我地長大的這個居所了。之前，很想很想快d搬離開這個區；但而家又有點不捨。不過無論如何，我希望妳也可以同我地一齊見證著我們新的家，因為我仍然記住妳的願望：『希望有一個有窗，可以望到風景的房間。』讓我們一齊努力吧！

永遠愛妳的女兒